¹ Всяка премудрость от Господа и с ним есть во век. ² Песка морскаго, и капли дождевныя, и дни века кто изочтет? ³ Высоту небесе и широту земли, и бездну и премудрость кто изследит? ⁴ Прежде всех создася премудрость, и разум мудрости от века. ⁵ Источник премудрости слово Божие в вышних, и шествия ея заповеди вечныя. ⁶ Корень премудрости кому открыся? и коварства ея кто разуме? ⁷ Един есть премудр, страшен зело, седяй на престоле своем, Господь. ⁸ Сам созда ю, и виде, и сочте ю, ⁹ и излия ю на вся дела своя, ¹⁰ со всякою плотию по даянию своему, и дарова ю любящым его. ¹¹ Страх Господень слава и похвала, и веселие и венец радости. ¹² Страх Господень возвеселит сердце и даст веселие и радость и долгоденствие. ¹³ Боящемуся Господа благо будет на последок, и в день скончания своего обрящет благодать. Страх Господень дар от Господа и на стезях любления поставляет. ¹⁴ Любление Господа преславная премудрость, и имже является, разделяет себе в ведение его. ¹⁵ Начало премудрости боятися Господа, и с верными в ложеснех создася им: с человеки основание века угнезди и с семенем их уверится. ¹⁶ Исполнение премудрости еже боятися Господа, и упоит их от плодов ея: ¹⁷ весь дом их исполнит желаний своих и сосуды от жит ея. ¹⁸ Венец мудрости страх Господень, возцветаяй мир и здравие изцеления: обоя же суть дары Божии, и разширяет веселие любящым его. ¹⁹ И виде и сочте ю: художество и ведение разума одожди, и славу держащих ю вознесе. ²⁰ Корень премудрости еже боятися Господа, и ветви ея долгоденствие. ²¹ Страх Господень отреяет грехи: пребываяй же в нем отвращает гнев. ²² Не может ярость неправедная оправдитися: устремление бо ярости его падение ему. ²³ До времене стерпит долготерпеливый, и последи воздаст ему веселие: ²⁴ до времене скрыет словеса своя, и устне верных исповедят разум его. ²⁵ В сокровищих премудрости притча ведения: мерзость же грешнику Богочестие. ²⁶ Возжелев премудрости, соблюди заповеди, и Господь подаст ю тебе: ²⁷ премудрость бо и наказание страх Господень, и благоволение его вера и кротость. ²⁸ Не сумневайся о страсе Господни и не приступи к нему сердцем раздвоеным. ²⁹ Не лицемерствуй пред усты человеческими и устнам твоим вонми. ³⁰ Не возносися, да не падеши и наведеши души твоей безчестие, и открыет Господь тайная твоя и посреде сонма низложит тя: яко не приступил еси во истине ко страху Господню, и сердце твое исполнено лукавства.