¹ Суетни убо вси человецы естественне, в нихже обретается неведение о Бозе, и от видимых благ не возмогоша уразумети сущаго, ни делом внемлюще познаша хитреца: ² но или огнь, или дух, или скор воздух, или круг звездный, или зелную воду, или светила небесная, строители миру боги (быти) возмнеша. ³ Ихже аще убо красотою услаждающеся, сия боги возмнеша, да уведят, колико сих Владыка есть лучший: красоты бо родоначалник созда я. ⁴ Аще же силе и действию удивишася, да уразумеют от них, колико сотворивый сия сильнейший есть: ⁵ от величества бо красоты созданий сравнително рододелатель их познавается. ⁶ Но обаче на сих есть уничижение мало, ибо сами сии негли прельщаются, Бога ищуще и хотяще обрести: ⁷ в делех бо его живуще изследуют и увещаваются зраком, яко блага видимая. ⁸ Паки ниже сии прощения достойни: ⁹ аще бо толико возмогоша ведети, да возмогут уразумети век, сих же Владыку како скорее не обретоша? ¹⁰ Окаянни же суть, и в мертвых упования их, иже назваша боги дела рук человеческих, злато и сребро, хитрости умышление, и подобия животных, или камение неключимо, дело руки древния. ¹¹ Аще же кто дровосечец тектон, угодное древо отсек, отешет благохудожне всю кору его, и хитрствуя благолепне сотворит угоден сосуд во употребление жития, ¹² останки же дела на уготование брашна изнурив насытися: ¹³ останок же иже от них ни во что благопотребен, древо криво и сучия полно, приим извая с прилежанием праздности своея и искусством разума изобрази его, и уподоби его образу человечу, ¹⁴ или некоему животному ничтожному уподоби его, помазав шарами различными и очервленив вид его, и всяк порок, иже на нем есть, измазав, ¹⁵ и сотворив ему достойное его обитание, на стене постави е, укрепив железом. ¹⁶ Да не убо падет, предумысли о нем, ведый, яко не может помощи себе: ибо идол есть и требует помощи. ¹⁷ О стяжаниих же и о брацех и чадех своих моляся, не стыдится к бездушному глаголя, ¹⁸ и о здравии убо немощное призывает, и о животе мертвое молит, и в помощь неключимое призывает, ¹⁹ и о путешествии (просит) ниже ходити могущаго, и о притяжании и деянии и о рук подтверждении некрепкаго руками, мужества просит от того, еже всех есть немощнейшее.