¹ Нетленный бо дух твой есть во всех. ² Темже заблуждающих помалу обличаеши, и в нихже согрешают, воспоминая учиши, да пременившеся от злобы веруют в тя, Господи. ³ И древних бо обитателей земли святыя твоея возненавидев, ⁴ ради деяний злых волшвений, яже творяху, и жертв непреподобных, ⁵ и чадоубийц немилостивых, и утробоядцев человеческих плотей, и кровопийцев от среды святыни твоея, ⁶ и родителей убивших душы безпомощныя, восхотел еси погубити руками отец наших: ⁷ да достойное приимет преселение отроков Божиих, яже у тебе всех дражайшая земля. ⁸ Но и сих яко человеков пощадил еси, послал же еси предтекущыя воинства твоего осы, яко да тех помалу истребят. ⁹ Не несилен еси во брани покорити нечестивых праведным, или зверем свирепым, или словом жестоким до единаго потребити: ¹⁰ судящь же помалу давал еси место покаянию, не неведяй, яко лукав род их и естественная злоба их, и яко не пременится помышление их во век. ¹¹ Семя бо бе проклято от начала: ниже бояйся кого, отпущение даял еси грехом их. ¹² Кто бо речет (тебе): что сотворил еси? Или кто станет противу суду твоему? кто же истяжет тя о языцех погибших, ихже ты сотворил еси? или кто в предстателство тебе приидет, отмститель на неправедныя человеки? ¹³ Несть бо ин Бог разве тебе, иже радиши о всех, да покажеши, яко не неправо судил еси. ¹⁴ Ниже царь, или мучитель противу тебе воззрети может, о ихже погубил еси. ¹⁵ Праведен же сый, праведно вся управляеши, недолжнаго же мучитися осудити чуждо мниши твоея силы. ¹⁶ Крепость бо твоя правды начало и еже над всеми твое владычество, всех щадети творит. ¹⁷ Крепость бо показуеши неверующым о совершенстве силы, а в ведущих дерзость обличаеши. ¹⁸ Ты же владычествуяй силою в кротости судиши и с великим щадением разсмотряеши нас: с тобою бо есть, егда хощеши, еже мощи. ¹⁹ Научил же еси люди твоя сицевыми делы, яко подобает праведному быти человеколюбцу, и благонадежны сотворил еси сыны твоя, яко даеши о гресех покаяние. ²⁰ Аще бо враги отроков твоих и должных смерти с толиким мучил еси внятием и щадением, даяй времена и место, имиже бы изменилися от злобы: ²¹ с коликим прилежанием судил еси сыны твоя, ихже отцем клятвы и заветы дал еси благих обещаний. ²² Нас убо наказуя, враги нашя тмами биеши, да благостыню твою помышляем судяще, судими же чаем милости. ²³ Отюнудуже и неправедных, во безумии поживших живот, свойственными их мерзостьми мучил еси, ²⁴ ибо в путех заблуждения должае заблудиша, боги мняще, яже и во животных вражиих безчестна, аки младенцы безумнии прельстившеся. ²⁵ Сего ради яко отроком несмысленным суд в поругание послал еси: ²⁶ иже поруганьми прещения не наказавшеся, достойна суда Божия искусят. ²⁷ В нихже бо тии страждуще негодоваху, в сих, ихже мняху быти боги, в тех мучими, видяще егоже прежде отметахуся знати, ²⁸ Бога истиннаго познаша: темже и конец осуждения прииде на ня.