¹ Досязает же от конца даже до конца крепко и управляет вся благо. ² Сию возлюбих и поисках от юности моея, и взысках невесту привести себе, и любитель бых красоты ея. ³ Благородство славит сожитие Божие имущи, и всех Владыка возлюби ю: ⁴ таибница бо есть Божия хитрости и обретателница дел его. ⁵ И аще богатство есть вожделенное притяжание в животе, что премудрости богатейше, еюже делаются вся? ⁶ Аще же разум делает, кто ея от сущих лучший художник есть? ⁷ И аще правду любит кто, труды ея суть добродетели: целомудрию бо и разуму учит, правде и мужеству, ихже потребнее ничтоже есть в житии человеком. ⁸ Аще же и многаго искусства желает кто, весть древняя и быти хотящая разсмотряет: свесть извития словес и разрешения гаданий, знамения и чудеса проразумевает и сбытия времен и лет. ⁹ Судих убо сию привести мне к сожитию, ведый, яко будет ми советница благих и утешение попечений и печали. ¹⁰ Имети буду ради ея славу в народех и честь пред старцы, юн сый: ¹¹ остр обрящуся в суде, и лица сильных удивятся мне: ¹² молчащу ми потерпят и вещающу ми имут внимати, и глаголющу ми о мнозе, руку положат на уста своя. ¹³ Сея ради прииму безсмертие и память вечную сущым по мне оставлю: ¹⁴ управлю люди, и языцы покорятся ми: ¹⁵ убоятся мене слышавшии мучителие страшнии: во множестве явлюся благ и в брани крепок. ¹⁶ Вшед в дом мой упокоюся с нею: не бо имать горести сообщение ея, ни болезни сожитие тоя, но веселие и радость. ¹⁷ Сия помыслив во мне, печахся в сердцы моем, яко безсмертие есть в сродстве премудрости, ¹⁸ и в содружении ея услаждение благо, и в трудех руку ея богатство без оскудения, и в сообучении беседы ея разум, и благославие в приобщении словес ея, обхождах ишущь, да восприиму ю в себе. ¹⁹ Отрок же бех остроумен, душу же получих благу: ²⁰ паче же благ сый приидох в тело нескверно. ²¹ Познав же, яко не инако одержу, аще не Бог даст, и сие же бе разума, еже ведети, чия есть благодать, приидох ко Господу и молихся ему, и рекох от всего сердца моего: