¹ Хвалите Господа с небес, хвалите его в вышних. ² Хвалите его вси ангели его: хвалите его, вся силы его. ³ Хвалите его, солнце и луна: хвалите его вся звезды и свет. ⁴ Хвалите его, небеса небес и вода, яже превыше небес. ⁵ Да восхвалят имя Господне: яко той рече, и быша: той повеле, и создашася. ⁶ Постави я в век и в век века: повеление положи, и не мимо идет. ⁷ Хвалите Господа от земли, змиеве и вся бездны: ⁸ огнь, град, снег, голоть, дух бурен, творящая слово его: ⁹ горы и вси холми, древа плодоносна и вси кедри: ¹⁰ зверие и вси скоти, гади и птицы пернаты: ¹¹ царие земстии и вси людие, князи и вси судии земстии: ¹² юноши и девы, старцы с юнотами. ¹³ Да восхвалят имя Господне: яко вознесеся имя того единаго, исповедание его на земли и на небеси. ¹⁴ И вознесет рог людий своих: песнь всем преподобным его, сыновом израилевым, людем приближающымся ему.