¹ В конец, о точилех, псалом асафу. ² Радуйтеся Богу помощнику нашему, воскликните Богу иаковлю: ³ приимите псалом и дадите тимпан, псалтирь красен с гусльми: ⁴ вострубите в новомесячии трубою, во благознаменитый день праздника вашего: ⁵ яко повеление израилеви есть, и судба Богу иаковлю. ⁶ Свидение во иосифе положи е, внегда изыти ему от земли египетския: языка, егоже не ведяше, услыша. ⁷ Отят от бремене хребет его: руце его в коши поработасте. ⁸ В скорби призвал мя еси, и избавих тя: услышах тя в тайне бурне: искусих тя на воде пререкания. ⁹ Слышите, людие мои, и засвидетелствую вам, израилю, аще послушаеши мене: ¹⁰ не будет тебе бог нов, ниже поклонишися богу чуждему. ¹¹ Аз бо есмь Господь Бог твой, изведый тя от земли египетския: разшири уста твоя, и исполню я. ¹² И не послушаша людие мои гласа моего, и израиль не внят ми: ¹³ и отпустих я по начинанием сердец их, пойдут в начинаниих своих. ¹⁴ Аще быша людие мои послушали мене, израиль аще бы в пути моя ходил: ¹⁵ ни о чесомже убо враги его смирил бых, и на оскорбляющыя их возложил бых руку мою. ¹⁶ Врази Господни солгаша ему, и будет время их в век: ¹⁷ и напита их от тука пшенична, и от камене меда насыти их.