¹ В конец, песнь псалма воскресения. ² Воскликните Господеви вся земля, пойте же имени его, дадите славу хвале его. ³ Рцыте Богу: коль страшна дела твоя? во множестве силы твоея солжут тебе врази твои. ⁴ Вся земля да поклонится тебе и поет тебе, да поет же имени твоему, вышний. ⁵ Приидите и видите дела Божия, коль страшен в советех паче сынов человеческих. ⁶ Обращаяй море в сушу, в реце пройдут ногами: тамо возвеселимся о нем, ⁷ владычествующем силою своею веком: очи его на языки призираете: преогорчевающии да не возносятся в себе. ⁸ Благословите, языцы, Бога нашего, и услышан сотворите глас хвалы его, ⁹ положшаго душу мою в живот, и не давшаго во смятение ног моих. ¹⁰ Яко искусил ны еси, Боже, разжегл ны еси, якоже разжизается сребро. ¹¹ Ввел ны еси в сеть, положил еси скорби на хребте нашем. ¹² Возвел еси человеки на главы нашя: проидохом сквозе огнь и воду, и извел еси ны в покой. ¹³ Вниду в дом твой со всесожжением, воздам тебе молитвы моя, ¹⁴ яже изрекосте устне мои, и глаголаша уста моя в скорби моей. ¹⁵ Всесожжения тучна вознесу тебе с кадилом, и овны, вознесу тебе волы с козлы. ¹⁶ Приидите, услышите, и повем вам, вси боящиися Бога, елика сотвори души моей. ¹⁷ К нему усты моими воззвах, и вознесох под языком моим. ¹⁸ Неправду аще узрех в сердцы моем, да не услышит мене Господь. ¹⁹ Сего ради услыша мя Бог, внят гласу моления моего. ²⁰ Благословен Бог, иже не отстави молитву мою и милость свою от мене.