¹ В конец, о изменитися хотящих, в столпописание давиду, в научение: ² внегда сожже средоречие сирийское и сирию совалскую, и возвратися иоав и порази едома в дебри солей дванадесять тысящ. ³ Боже, отринул ны еси и низложил еси нас, разгневался еси и ущедрил еси нас. ⁴ Стрясл еси землю и смутил еси ю: изцели сокрушение ея, яко подвижеся. ⁵ Показал еси людем твоим жестокая: напоил еси нас вином умиления. ⁶ Дал еси боящымся тебе знамение, еже убежати от лица лука. ⁷ Яко да избавятся возлюбленнии твои, спаси десницею твоею и услыши мя. ⁸ Бог возглагола во святем своем: возрадуюся, и разделю сикиму, и юдоль жилищ размерю. ⁹ Мой есть галаад, и мой есть манассий, ефрем крепость главы моея, иуда царь мой. ¹⁰ Моав коноб упования моего: на идумею простру сапог мой: мне иноплеменницы покоришася. ¹¹ Кто введет мя во град ограждения? или кто наставит мя до идумеи? ¹² Не ты ли, Боже, отринувый нас? и не изыдеши, Боже, в силах наших? ¹³ Даждь нам помощь от скорби: и суетно спасение человеческо. ¹⁴ О Бозе сотворим силу: и той уничижит стужающыя нам.