¹ Паки же отвещав Господь, рече ко иову из облака: ² ни, но препояши яко муж чресла твоя: вопрошу же тя, ты же ми отвещай. ³ Не отвергай суда моего: мниши ли мя инако тебе сотворша, разве да явишися правдив? ⁴ Еда мышца ти есть на Господа, или гласом на него гремиши? ⁵ Приими же высоту и силу, в славу же и в честь облецыся: ⁶ пусти же ангелы гневом и всякаго укорителя смири, ⁷ величава же угаси и согной нечестивыя абие: ⁸ скрый же в землю вне вкупе и лица их безчестия исполни. ⁹ Исповем, яко может десница твоя спасти. ¹⁰ Но убо се, зверие у тебе, траву аки волове ядят: ¹¹ се убо, крепость его на чреслех, сила же его на пупе чрева: ¹² постави ошиб яко кипарис, жилы же его (яко уже) сплетены суть, ¹³ ребра его ребра медяна, хребет же его железо слияно. ¹⁴ Сиесть начало создания Господня: сотворен поруган быти ангелы его: ¹⁵ возшед же на гору стреминную, сотвори радость четвероногим в тартаре: ¹⁶ под всяким древом спит, при рогозе и тростии и ситовии: ¹⁷ осеняют же над ним древеса велика с леторасльми и ветви напольныя: ¹⁸ аще будет наводнение, не ощутит: уповает, яко внидет иордан во уста его: ¹⁹ во око свое возмет его, ожесточився продиравит ноздри. ²⁰ Извлечеши ли змиа удицею, или обложиши узду о ноздрех его? ²¹ или вдежеши колце в ноздри его? шилом же провертиши ли устне его? ²² возглаголет же ли ти с молением, (или) с прошением кротко? ²³ сотворит же ли завет с тобою? поймеши же ли его раба вечна? ²⁴ поиграеши же ли с ним, якоже со птицею, или свяжеши его яко врабия детищу? ²⁵ питаются ли же им языцы, и разделяют ли его финикийстии народи? ²⁶ вся же плавающая собравшеся не подимут кожи единыя ошиба его, и корабли рыбарей главы его. ²⁷ Возложиши же ли нань руку, воспомянув брань бывающую на теле его? и ктому да не будет.