¹ Отвещав же иов, рече: ² кому прилежиши, или кому хощеши помогати? не сему ли, емуже многа крепость и емуже мышца крепка есть? ³ Кому совет дал еси? не емуже ли вся премудрость? Кого поженеши? не емуже ли превелия сила? ⁴ Кому возвестил еси глаголы? дыхание же чие есть исходящее из тебе? ⁵ Еда исполини родятся под водою и соседми ея? ⁶ Наг ад пред ним, и несть покрывала пагубе. ⁷ Простираяй север ни на чемже, повешаяй землю ни на чемже, ⁸ связуяй воду на облацех своих, и не расторжеся облак под нею: ⁹ держай лице престола, простирая над ним облак свой: ¹⁰ повеление окружи на лице воды даже до скончания света со тмою. ¹¹ Столпи небеснии прострошася и ужасошася от запрещения его. ¹² Крепостию укроти море, и хитростию его низложен бысть кит: ¹³ вереи же небесныя убояшася его: повелением же умертви змиа отступника. ¹⁴ Се, сия части пути его: и о капли слова услышим в нем: силу же грома его кто уведа, когда сотворит?