¹ Человек бо рожден от жены малолетен и исполнь гнева: ² или якоже цвет процветый отпаде, отбеже же яко сень, и не постоит. ³ Не и о сем ли слово сотворил еси, и сему сотворил еси внити на суд пред тя? ⁴ Кто бо чист будет от скверны? никтоже, ⁵ аще и един день житие его на земли: изочтени же месяцы его от тебе, на время положил еси, и не преступит. ⁶ Отступи от него, да умолкнет и изберет житие якоже наемник. ⁷ Есть бо древу надежда: аще бо посечено будет, паки процветет, и леторасль его не оскудеет: ⁸ аще бо состареется в земли корень его, на камени же скончается стебло его, ⁹ от вони воды процветет, сотворит же жатву, якоже новосажденное. ¹⁰ Муж же умерый отиде, пад же человек, ктому несть. ¹¹ Временем бо оскудевает море, река же опустевши изсше: ¹² человек же уснув не востанет, дондеже не будет небо сошвено, и не возбудятся от сна своего. ¹³ Убо, о, дабы во аде мя сохранил еси, скрыл же мя бы еси, дондеже престанет гнев твой, и вчиниши ми время, в неже память сотвориши ми. ¹⁴ Аще бо умрет человек, жив будет: скончав дни жития своего, потерплю, дондеже паки буду. ¹⁵ Посем воззовеши, аз же послушаю тя: дел же руку твоею не отвращайся: ¹⁶ изчислил же еси начинания моя, и ничтоже тя мимоидет от грех моих: ¹⁷ запечатлел же ми еси беззакония в мешце, назнаменал же еси, аще что неволею преступих. ¹⁸ Обаче и гора падающи распадется, и камень обетшает от места своего: ¹⁹ камение огладиша воды, и потопиша воды взнак холмы земныя, и ожидание человеческо погубил еси. ²⁰ Отринул еси его до конца, и отиде: изменил еси ему лице и испустил еси. ²¹ Многим же бывшым сыном его, не весть: аще же и мало их будет, не знает: ²² но плоти его болеша, душа же его о себе сетова.