¹ Отвещав же софар минейский, рече: ² глаголяй много, и противоуслышит: или многоречив мнится быти праведен? благословен рожденный от жены малолетен. ³ Не мног во словесех буди: несть бо противовещаяй ти. ⁴ Не глаголи бо, яко чист есмь делы и безпорочен пред ним: ⁵ но како Господь возглаголет к тебе и отверзет устне свои с тобою? ⁶ Потом возвестит ти силу премудрости, яко сугуб будет в сих, яже противу тебе: и тогда уразумееши, яко достойная тебе сбышася от Господа, имиже согрешил еси, ⁷ Или след Господень обрящеши? или в последняя достигл еси, яже сотвори вседержитель? ⁸ Высоко небо, и что сотвориши? глубочае же сущих во аде что веси? ⁹ не должае ли меры земныя, или широты морския? ¹⁰ Аще же превратит вся, кто речет ему: что сотворил еси? ¹¹ Той бо весть дела беззаконных: видев же нелепая, не презрит. ¹² Человек же инако обилует словесы: земный же рожденный от жены равен ослу пустынному. ¹³ Аще бо ты чисто положил еси сердце твое, воздеваеши же руце твои к нему, ¹⁴ аще беззаконно что есть в руку твоею, далече сотвори е от тебе, неправда же в жилищи твоем да не вселится: ¹⁵ тако бо ти возсияет лице, якоже вода чиста: совлечешися же скверны, и не убоишися, ¹⁶ и труда забудеши, якоже волны мимошедшия, и не устрашишися. ¹⁷ Молитва же твоя, аки денница, и паче полудне возсияет ти жизнь: ¹⁸ уповая же будеши, яко будет ти надежда: от туги же и попечения явится ти мир: ¹⁹ упокоишися бо, и не будет боряй тя: пременяющиися же мнози имут просити тя, ²⁰ спасение же оставит их: надежда бо их пагуба, очи же нечестивых истают.