¹ Во вторыйнадесять месяц, иже есть адар, в третийнадесять день месяца приидоша писания от царя. ² В той же день погибоша супостаты иудеев: ни един бо сопротивися им бояся их. ³ Началствующии бо странам и властителие и царстии книгочия почитаху иудей: ⁴ страх бо мардохеев належаше на них. ⁵ Приложися бо повеление царево именоватися ему по всему царствию. ⁶ И в сусех граде избиша иудее пять сот мужей: ⁷ Фарсана, нестанна и делфона, и фасгана ⁸ и фардафана, и вареа и сарвакана, ⁹ и мармасима и руфеа, и арсеа и завуфефама, ¹⁰ десять сынов амана амадафуева вугеанина врага иудеом, иже от фармафеа, и разграбиша в той день (имения их): ¹¹ и сказаша число избиенных царю в сусех граде. ¹² И рече царь ко есфири: избиша иудее в сусе граде пять сот мужей, по окрестным же странам колико, мниши, погубиша? и чесого еще просиши, и будет ти? ¹³ И рече есфирь ко царю: да дастся такожде иудеом творити заутра, яко да повесят десять сынов амановых. ¹⁴ И повеле царь тако быти, и попусти иудеом вне града повесити телеса сынов амановых. ¹⁵ И собрашася иудее, иже в сусех, в четвертыйнадесять деень адара, и избиша мужей триста, и ничтоже разграбиша. ¹⁶ Прочии же иудее, иже во царствии, собрашася и себе помогаху и почиша от браней: избиша бо от них пятьнадесять тысящ в третийнадесять адара, и ничтоже расхитиша. ¹⁷ И почиша в четвертыйнадесять день тогожде месяца и провождаху той день упокоения с радостию и веселием. ¹⁸ Иудее же в сусех граде собрашася и в четвертыйнадесять почиша: проводиша же и пятыйнадесять с радостию и веселием. ¹⁹ Сего ради иудее разсеяннии во всяцей стране внешней провождают четвертыйнадесять день адара благ с веселием, посылающе части кийждо ближнему: живущий же в митрополиях и в пятыйнадесять день адара веселия благий провождают, посылающе части ближним. ²⁰ Написа же мардохей словеса сия в книгу и посла иудеом, елицы беша в царствии артаксерксове, близ и далече сущым, ²¹ уставити дни сия благи, еже провождати четвертыйнадесять и пятыйнадесять день адара: ²² в сих бо днех почиша иудее от враг своих: и месяц адар, иже обратися им от плача в радость и от болезни во благий день, провождати весь во благих днех радости и веселия, посылающе части ко другом и нищым. ²³ И прияша иудее, якоже написа им мардохей: ²⁴ како аман амадафуев македонянин ратоваше иудеев, и како изнесе суд и жребий, еже погубити их, ²⁵ и яко вниде ко царю, глаголя, да повесит мардохеа: елика нача наводити на иудеи злая, на него быша, и повешен бысть сам и чада его. ²⁶ Сего ради нарекошася дние сии фурим ради жребий, зане диалектом их жребии нарицаются фурим, ради словес епистолии сея, и елика пострадаша сих ради, и елика им приключишася. ²⁷ Устави убо, и тако прияша иудее на себе и на семя свое и на ириложившихся к ним, ниже иначе да употребляют: дние же сии памяти совершаеми по роду и роду, и граду и отечеству и стране. ²⁸ Дние же сии фурим да провождают во всякое лето, и память да не оскудеет от родоб. ²⁹ И написа есфирь царица дщи аминадавля и мардохей иудеанин, елика сотвориша во утверждение епистолии о днех фурим. ³⁰ И мардохей и есфирь царица устависта себе сами, и тогда устависта в посте своем совет свой. ³¹ И есфирь слово постави во веки, и написано бысть в память.