¹ Господь же отя сон от царя в нощи оней. И повеле рабу своему принести книги памятныя дний прочитати ему: ² и обрете писания написанная о мардохеи, како поведа царю о двою евнуху царскую, внегда стрещи има, и умыслиста убити (царя) артаксеркса. ³ И рече царь: кую славу или благодать сотворихом мардохею? И рекоша отроцы царевы: ничтоже сотворил еси ему? ⁴ Вопрошающу же царю о благодеянии мардохеове, се, аман прииде во двор, и рече царь: кто есть во дворе? Аман же прииде рещи цареви, да повесит мардохеа на древе, еже уготова. ⁵ И рекоша отроцы царевы: се, аман стоит во дворе. И рече царь: призовите его. ⁶ И рече царь аману: что сотворю мужу, егоже аз хощу прославити? рече же в себе аман: кого хощет царь прославити, разве мене? ⁷ Рече же царю: мужа, егоже хощет царь прославити, ⁸ да принесут отроцы царевы одежду виссонную, еюже царь облачается, и коня, на немже царь ездит, ⁹ и да дастся единому от другов царевых славных, и да облечет мужа, егоже царь любит, и да посадит его на коня и проповесть на улицах града, глаголя: тако будет всякому человеку, егоже царь прославит. ¹⁰ И рече царь аману: добре рекл еси: тако сотвори мардохею иудеанину, угодно служащему во дворе (нашем), и да не изменится слово твое от сих, яже рекл еси. ¹¹ И взя аман одежду и коня, и облече мардохеа, и возведе его на коия, и пройде по улицам града, и проповедаше (пред ним), глаголя: сице будет всякому человеку, егоже хощет цар прославити. ¹² И возвратися мардохеи во двор (царев): аман же иде в дом свой скорбя преклонив главу. ¹³ И сказа аман случившаяся ему зосаре жене своей и другом своим. И реша ему друзие его и жена: аще от племене иудейскаго мардохей, начал еси смирятися пред ним, падая падеши, и не возможеши ему отмстити, яко Бог живый есть с ним. ¹⁴ И еще глаголющым им, приидоша евнуси, спешно зовуще амана на пир, егоже уготова есфирь.