¹ Егда же позде бысть, потщашася раби его отити, и вагоа заключи шатер отвне и отпусти предстоящих от лица господина своего, и отидоша к ложам своим, бяху бо вси утруждени, зане на мнозе пребысть пир. ² Остася же иудиф едина в шатре, и олоферн повержен на ложи своем: бяше бо преисполнен вином. ³ И рече иудиф рабе своей, да стоит вне ложницы ея и да смотрит исхода ея якоже по всяк день: рече бо, яко изыти имать на молитву свою: и вагою глагола по словесем сим. ⁴ И отидоша вси от лица ея, и ни един остася в ложнице от мала даже до велика. И ставши иудиф при одре его, рече в сердцы своем: Господи, Боже всея силы, призри в час сей на дела рук моих ко возвышению Иерусалима, ⁵ яко ныне время помоществовати наследию твоему и совершити начинание мое ко сокрушению врагов, иже восташа на нас. ⁶ И приступивши к столпнику одра, иже бяше у главы олоферновы, снят мечь его с него, ⁷ и приближившися ко одру, взя в горсть власы главы его и рече: укрепи мя, Господи Боже израилев, в день сей. ⁸ И удари в выю его дважды силою своею, и отя главу его от него, ⁹ и отвали тело его от постелн, и отя завесу от столпов: и по мале изыде и предаде рабыни своей главу олофернову: ¹⁰ и вложи ю в мешец снедей своих. И изыдосте обе купно по обычаю своему на молитву: и прошедше полк, обыдосте дебрь оную, и взыдосте на гору ветилуи, и приидосте ко вратом ея. ¹¹ И рече иудиф издалеча стрегущым на вратех: отверзите ныне, отверзите врата, с нами Бог, Бог наш, сотворити еще крепость во израили и силу на враги, якоже и днесь сотвори. ¹² И бысть яко услышаша мужие града того глас ея, потщашася снити ко вратом града своего и созваша старцев града. ¹³ И стекошася вси от мала даже до велика, яко паче чаяния бе им, еже приити ей, и отверзоша врата и восприяша их: и вжегше огнь во свещение, окружиша их. ¹⁴ Она же рече к ним гласом великим: хвалите Бога, хвалите: хвалите Бога, иже не отстави милости своея от дому израилева, но сокруши враги нашя рукою моею в нощь сию. ¹⁵ И иземши главу из мешца показа и рече им: се, глава олоферна вождоначалника силы ассурския, и се, завеса, за неюже лежаше во пиянствах своих, и порази его Господь рукою женскою: ¹⁶ и жив есть Господь, иже сохрани мя в пути моем, имже ходих, яко прельсти его лице мое в пагубу его, и не сотвори греха со мною во осквернение и срамоту. ¹⁷ И ужасошася вси людие зело, и падше поклонишася Богу, и реша единодушно: благословен еси, Боже наш, уничтоживый в день сей враги людий твоих. ¹⁸ И рече ей озиа: благословена ты еси, дщи, Богом вышним паче всех жен яже на земли, и благословен Господь Бог, иже созда небеса и землю, иже управи тя на сокрушение главы князя врагов наших: ¹⁹ яко не отстанет надежда твоя от сердца человек, поминающих крепость Божию, даже до века: ²⁰ и да сотворит тебе сия Бог в возношение вечное, еже посещати тя во благих, за еже не пощадела еси души твоея смирения ради рода нашего, но пособствовала еси падению нашему, в правоте ходивши пред Богом нашим. И реша вси людие: буди, буди.