¹ Лета вторагонадесять царства навуходоносора, иже царствова над ассирианы в ниневии граде велицем, во дни арфаксада, иже царствова над мидяны во екватанех ² и созда во екватанех окрест стены от каменей тесаных в широту лактей триех, а в долготу лактей шести, и сотвори высоту стены лактей седмидесяти, а широту ея лактей пятидесяти: ³ и столпы ея постави на вратех его лактей сто, и широту их основа на лактей шетьдесят: ⁴ и сотвори врата его врата воздвижена в высоту лактей седмьдесят, а широту их лактей четыредесять ко исходу сил сильных его и устроением пешцев его: ⁵ и сотвори брань во дни оны царь навуходоносор на царя арфаксада на поли велицем, еже есть в пределех рагавлих. ⁶ И собрашася к нему вси живущии в горней и вси обитающии при евфрате и тигре и идаспи и на поли ариоха царя елимеонска, и собрашася языцы мнози зело на ополчение сынов хелеудих. ⁷ И посла навуходоносор царь ассирийский ко всем обитающым в персиде и ко всем живущым к западом, обитающым в киликии и дамасце, и ливане и антиливане, и ко всем живущым на лицы примория, ⁸ и к сущым во языцех кармила и в галааде, и в вышней галилеи и на велицем поли есдрилона, ⁹ и ко всем сущым в самарии и градех ея, и об он пол Иордана даже до Иерусалима и ветани, и хелла и кадиса, и реки египетския и тафны, и рамесси и всея земли гесемския, ¹⁰ дондеже приити выше таниса и мемфиса, и ко всем обитающым во египте, дондеже приити на пределы Ефиопии. ¹¹ И ни во что вмениша вси обитающии по всей земли слово навуходоносора царя ассирийска, и не снидошася к нему на брань, понеже не бояшася его, но бысть пред ними аки муж един: и возвратиша посланников его тщих со безчестием от лица своего. ¹² И разярися навуходоносор на всяку землю сию зело, и клятся престолом и царством своим всячески отмстити всем пределом киликии и дамаска и сирии, погубити мечем своим и вся живущыя в земли моавли и сыны аммони, и всю иудею и всех сущих во египте, доидеже приити на пределы двух морь. ¹³ И ополчися в силе своей на арфаксада царя в лето седмоенадесять, и одоле на брани своей, и победи всю силу арфаксадову и всю конницу его и вся колесницы его, ¹⁴ и возоблада градами его: и прииде даже до екватан, и одержа столпы, и плени стогны его, и красоту его положи во уничижение его: ¹⁵ и взя арфаксада на горах рагавлих, и избоде его сулицами своими, и истреби его даже в день оный: ¹⁶ и возвратися с ними в ниневию сам и все присовокупление его, множество мужей ратных многое зело, и бе тамо почивая и пиршествуя сам и сила его дний сто двадесять.