¹ В день же двадесять четвертый месяца сего собрашася сынове израилевы в посте и во вретищих, и персть на главах их. ² И отлучишася сынове израилевы от всякаго сына чужда, и исповедаху грехи своя и беззакония отец своих. ³ И сташа на стоянии своем и чтоша в книзе закона Господа Бога своего четверицею в день, и бяху исповедающеся Господеви и покланяющеся Господу Богу своему. ⁴ И сташа на степени левитов иисус и сынове кадмиили, саханиа сын саравиин, сынове ханани, и возопиша гласом великим ко Господу Богу своему, ⁵ и рекоша левити, иисус и кадмиил: востаните, благословите Господа Бога нашего от века даже до века: и благословят имя славы твоея, и вознесут во всяцем благословении и хвале. ⁶ И рече ездра: ты еси сам Господь един, ты сотворил еси небо и небо небесе и вся вои их, землю и вся, елика на ней суть, моря и вся, яже в них, и ты оживляеши вся, и вои небеснии покланяются тебе: ⁷ ты еси Господь Бог, ты избрал еси аврама и извел еси его от страны халдейския, и положил еси имя ему авраам, ⁸ и обрел еси сердце его верно пред тобою, и завещал еси с ним завет дати ему землю хананейску и хеттейску, и аморрейску и ферезейску, и иевусейску и гергесейску, и семени его: и утвердил еси словеса твоя, яко праведен еси: ⁹ и видел еси озлобление отец наших во египте, и вопль их услышал еси на мори чермнем, ¹⁰ и дал еси знамения и чудеса во египте на фараона и на вся рабы его и на вся люди земли его: познал бо еси, яко возгордешася на них, и сотворил еси себе имя, якоже день сей: ¹¹ и море расторгл еси пред ними, и проидоша посреде моря по суху, и гонители их ввергл еси в глубину, яко камень в воде зелней: ¹² и в столпе облачне водил еси их во дни и в столпе огненне в нощи, еже осветити им путь, по немуже идоша: ¹³ и на гору синайскую сшел еси, и глаголал еси к ним с небесе, и дал еси им судбы правы и закон истинный, повеления и заповеди благи: ¹⁴ и субботу святую твою явил еси им, заповеди, повеления и закон повелел еси им рукою моисеа раба твоего: ¹⁵ хлеб же с небесе дал еси им во алчбе их в пищу им, и воду из камене извел еси им в жажди их, и рекл еси им, да внидут и наследят землю, на нюже простерл еси руку твою дати им: ¹⁶ тии же и отцы наши возгордешася и ожесточиша выя своя и не послушаша заповедий твоих, ¹⁷ и не восхотеша слышати, и не воспомянуша чудес твоих, яже сотворил еси им: и ожесточиша выю свою, и даша начало возвратитися на работу свою во египет: ты же, Боже, милостив и щедр, долготерпелив и многомилостив, и не оставил еси их: ¹⁸ еще же сотвориша себе и телца слияна и рекоша: сии бози изведоша нас из египта: и сотвориша раздражения велия: ¹⁹ ты же в щедротах твоих многих не оставил еси их в пустыни, столп облачный не уклонил еси от них во дни, еже наставити их на путь, и столп огненный в нощи, еже осветити им путь по немуже идоша, ²⁰ и дух твой благ дал еси, еже научити их, и манны твоея не лишил еси от уст их, и воду дал еси им в жажди их, ²¹ и четыредесять лет препитал еси их в пустыни, ничтоже им оскуде: одеяния их не состарешася, и сапози их не раздрашася: ²² и дал еси им царства, и люди разделил еси им, и наследиша землю сиона царя есевонска и землю ога царя васанска: ²³ и умножил еси сыны их яко звезды небесныя, и ввел еси их в землю, о нейже глаголал еси отцем их внити и наследити ю: ²⁴ (и внидоша сынове их) и наследиша землю: и сокрушил еси пред ними обитающих в земли хананейстей, и дал еси их в руку их, и цари их и люди земли, да сотворят им якоже угодно пред ними: ²⁵ и взяша грады высокия, и одержаша домы полны всех благих, кладязи ограждены камением, винограды и маслины и всяко древо снедное во множество, и ядоша и насытишася, и утолстеша и разширишася во благости твоей велицей: ²⁶ и изменишася и отступиша от тебе, и повергоша закон твой созади плоти своея, и пророки твоя избиша, иже засвидетелствоваху им, да обратятся к тебе, и сотвориша хулы велики: ²⁷ и дал еси их в руку оскорбляющих я, и озлобиша их: и во бремя печали своея возопиша к тебе, и ты с небесе твоего услышал еси, и по щедротам твоим многим дал еси им спасителей, и спасл еси их от рук враг их: ²⁸ и егда упокоишася, возвратишася сотворити лукавое пред тобою: и оставил еси их в руках враг их, и обладаша ими: и паки возопиша к тебе, ты же от небесе услышал еси, и избавил еси их в щедротах твоих мнозех, ²⁹ и засвидетелствовал еси им, да обратятся к закону твоему: они же возгордешася и не послушаша, но в заповедех твоих и в судбах твоих согрешиша, яже сотворив человек жив будет в них: и даша плещы непокоривыя, и выю свою ожесточиша, и не послушаша: ³⁰ и продолжил еси на них лета многа, и засвидетелствовал еси им духом твоим и рукою пророк твоих, и не вняша, и предал еси их в руку людий земных: ³¹ в милосердиих же твоих многих не сотворил еси их в скончание, ниже оставил еси их, яко Бог силен еси и милостив и щедр: ³² и ныне, Боже наш крепкий, великий, державный и страшный, храняй завет твой и милость твою, да не явится мал пред тобою всяк труд, иже обрете нас и цари нашя, и началники нашя и священники нашя, и пророки нашя и отцы нашя и вся люди твоя, от дний царей ассурских и даже до дне сего: ³³ и ты праведен во всех, яже приидоша на нас, яко истину сотворил еси, мы же согрешихом: ³⁴ и царие наши и началницы наши, и священницы наши и отцы наши не сотвориша закона твоего и не внимаша повелением твоим и свидением твоим, имиже засвидетелствовал еси им, ³⁵ и тии во Царствии твоем и во благостыни твоей мнозе, юже дал еси им, и в земли широцей и тучней, юже дал еси пред ними, не послужиша тебе и не отвратишася от начинаний своих лукавых: ³⁶ се, мы днесь есмы раби, и земля, юже дал еси отцем нашым ясти плод ея и благая ея, се, есмы раби на ней: ³⁷ и плоды ея мнози царем, имже предал еси нас за грехи нашя, и телесы нашими владычествуют и скоты нашими, якоже угодно им, и в печали велицей есмы: ³⁸ и во всех сих мы полагаем завет верен и пишем, и печатают вси началницы наши, левити наши и священницы наши.