¹ И егда моляшеся ездра и егда исповедашеся плачущь и моляся пред домом Божиим, собрашася к нему от израиля собрание велие зело, мужие и жены и отроцы яко плакахуся людие и вознесоша плачь. ² И отвеща сехениа сын иеилев от сынов иламлих и рече ездре: мы преступихом пред Богом нашим и пояхом жены чуждия от людий земли, и ныне есть упование израилю о сем: ³ и ныне завещаем завет Богу нашему, да отвержем вся жены и рожденых от них, якоже хощет: востани и устраши их заповедьми Бога нашего, и по закону да будет: ⁴ востани, понеже на тебе есть глагол, и мы с тобою: укрепися и сотвори. ⁵ И воста ездра, и закля князи, священники и левиты и всего израиля, да сотворят по словеси сему. И кляшася. ⁶ И воста ездра от лица дому Божия и иде в сокровищный дом ионана сына елисувова и седе тамо: хлеба не яде и воды не пи, плакаше бо о преступлении пришедших от пленения. ⁷ И послано бысть слово во иудею и во Иерусалим всем сыновом преселения, да соберутся во Иерусалим: ⁸ всяк, иже аще не приидет в три дни, по совету князей и старейшин, возмется все имение его, и той отлучен будет от сонмища преселения. ⁹ И собрашася вси мужие иудины и вениамини во Иерусалим треми денми: сей есть месяц девятый: в двадесятый день месяца седоша вси людие пред домом Божиим трепещуще о словеси и от зимы. ¹⁰ И воста ездра священник и рече к ним: вы преступисте и взясте жены иноплеменнически, еже приложити ко греху израилеву: ¹¹ и ныне дадите хвалу Господу Богу отец наших, и сотворите угодное пред ним, и отлучитеся от людий земли и от жен иноплеменнических. ¹² И отвещаша все множество гласом великим и реша: по словеси твоему к нам сотворим: ¹³ обаче людие мнози суть, и время зимнее, и несть мощно стояти вне: и дело несть дне единаго или двух, зело бо много согрешихом во словеси сем: ¹⁴ да поставятся князие наши во всем множестве и во всех градех наших, иже пояша жены иноплеменничи, да приидут во времена повеленная, и с ними старейшины от всякаго града и судии, еже отвратити гнев ярости Бога нашего от нас словесе ради сего. ¹⁵ Обаче ионафан сын асаилев и иасса сын фекуев со мною о сем, и месоллам и савафай левитин помагаяй им. ¹⁶ И сотвориша тако сынове преселения: и разыдошася ездра священник и мужие князие отечеств в домы, и вси по именом, яко обратишася в день первый месяца десятаго, да взыщут глагола: ¹⁷ и совершиша во всех мужех, иже пояша жены иноплеменничи, даже до дне перваго месяца перваго. ¹⁸ И обретени суть от сынов священнических иже введоша жены иноплеменничи, от сынов иисуса сына иоседекова и братия его маасиа и елиезер, и иарим и гадалиа: ¹⁹ и даша руки своя изгонити жены своя, и согрешившии принесоша от овец о преступлении своем овна: ²⁰ и от сынов еммировых ананий и завдиа: ²¹ и от сынов ирамлих маасиа и еллиа, и самиа и иеиил и озиа: ²² и от сынов фассуровых елиоинай, маасиа и исмаил, и нафанаель и иозавад и иласа: ²³ и от левитов иозавад и фамуй и колиа, тойже и колит, и фефеиа, и иуда и елиезер: ²⁴ и от певцев елисав: и от дверник солмин и телмин и одуа: ²⁵ и от израиля, от сынов форосовых рамиа и азиа, и мелхиа и мелмин, и елиазар и асавиа и ванеа: ²⁶ и от сынов иламовых матфаниа и захариа, и иаиил и авдий, и иеримоф и илиа: ²⁷ и от сынов зафуевых елионай, елисув, мафанай и армоф, и завад и озиза: ²⁸ и от сынов вавеиных ионан, ананиа и завуй и фали: ²⁹ и от сынов вануевых мосоллам, маллух, адаиа, иасув и саал и римоф: ³⁰ и от сынов фааф-моавлих еднеа и халил и ванаиа, маасиа, матфаниа, веселеил и вануй и манассии: ³¹ и от сынов ирамовых елиезер, иесиа, мелхиа, самаиа, семеон, ³² вениамин, малух, самариа: ³³ и от сынов асимовых метфанаиа, мафафа, завад, елифалет, иерами манассий, семей: ³⁴ и от сынов ванииных моодиа, амрам и уил, ³⁵ ванаиа, вадаиа, хелиа, ³⁶ уаниа, маримоф и елиасив, ³⁷ матфаниа мафанай. ³⁸ И сотвориша сынове вануиевы и сынове семеины, ³⁹ и салемиа и нафан и адаиа, ⁴⁰ махнада, авусесей, ⁴¹ аруесриил и самариа, ⁴² селлум, амариа, иосиф: ⁴³ от сынов навуиных иеиил, мафафиа, завад, зевенай, иадай и иоиль и ванеа. ⁴⁴ Вси тии пояша жены иноплеменнически, и родиша от них сыны.