¹ Сын двадесяти и пяти лет бяше иоафам, егда царствовати нача, и шестьнадесять лет царствова во Иерусалиме. Имя же матере его иеруса, дщи садокова. ² И сотвори правое пред Господем по всем, яже сотвори озиа отец его, обаче не вниде в церковь Господню, и еще людие согрешаху. ³ Той созда врата дому Господня высокая, и на стене офли созда многа: ⁴ и грады созда на горах иудиных, и в дубравех дворы и столпы. ⁵ И той ополчися противу царя сынов аммоних и одоле его: и даяху ему сынове аммони на всякое лето по сту талант сребра и десять тысящ кор (мер) пшеницы и десять тысящ ячменя: сия ему приношаше царь сынов аммоних на лето, в первое лето и второе и третие. ⁶ И укрепися иоафам, яко уготова пути своя пред Господем Богом своим. ⁷ Прочая же словеса иоафамля, и брань, и деяния его, се, писана в книзе царей иудиных и израилевых. ⁸ Сын двадесяти и пяти лет бяше, егда царствовати нача, и шестьнадесять лет царствова во Иерусалиме. ⁹ Успе же иоафам со отцы своими и погребен бысть во граде давидове. И воцарися ахаз сын его вместо его.