¹ И бысть иосафату богатство и слава многа, и поят жену в дому ахаавли. ² И сниде при концы лет ко ахааву в самарию: и закла ему ахаав овны и волы многи, и людем сущым с ним, и увещаваше его, да снидет с ним в рамоф галаадский. ³ И рече ахаав царь израилев ко иосафату царю иудину: пойдеши ли со мною в рамоф галаадский? И рече ему: якоже аз, тако и ты: и якоже людие твои, тако и людие мои с тобою на брань. ⁴ И рече иосафат царю израилеву: вопроси убо днесь Господа. ⁵ И собра царь израилев пророков четыреста мужей и рече к ним: пойду ли в рамоф галаадский на брань, или удержуся? И реша: взыди, и предаст Бог в руку цареву. ⁶ Рече же иосафат: несть ли зде пророка Господня еще, да от него вопросим? ⁷ И рече царь израилев ко иосафату: есть еще муж един, имже вопросити Господа, но аз ненавижду его, понеже не прорицает мне во благая, зане вси дние его во злая: сей михеа сын иемвлин . Рече же иосафат: не глаголи, царю тако. ⁸ И призва царь израилев единаго от евнух и рече ему: (призови) скоро михею сына иемвлина. ⁹ Царь же израилев и иосафат царь иудин кийждо седяше на престоле своем, и облечена красотою царскою, седяста же на пространстве близ врат самарийских, и вси пророцы пророчествоваху пред нима. ¹⁰ И сотвори себе седекиа сын ханаань роги железны и рече: сия глаголет Господь: сими избодеши сирию, дондеже скончается. ¹¹ И вси пророцы прорицаху тако, глаголюще: взыди в рамоф галаадский и предуспееши, и предаст Господь в руку цареву. ¹² Вестник же, шедый призвати михею, рече ему: се, рекоша пророцы единеми усты благая о цари да будут убо и твоя словеса, якоже единаго от них, и да речеши благая. ¹³ И отвеща михеа: жив Господь, яко еже аще речет Бог ко мне, сие возглаголю. ¹⁴ И прииде ко царю, и рече ему царь: михее, имам ли ити рамоф галаадский на брань, или удержуся? И отвеща: взыди и предуспееши, и предадутся (врази) в руки вашя. ¹⁵ И рече ему царь: колико крат заклинаю тя, да не глаголеши мне, токмо истину во имя Господне. ¹⁶ И рече михеа: видех всего израиля расточена по горам яко овцы, имже несть пастыря: и рече Господь: не имут сии вожда, да возвратятся кийждо в дом свой в мире. ¹⁷ И рече царь израилев ко иосафату: не рех ли тебе, яко не прорицает о мне благая, но токмо злая? ¹⁸ И рече михеа: не тако: слышите слово Господне: видех Господа седяща на престоле своем, и вся сила небесная предстояше одесную его и ошуюю его: ¹⁹ и рече Господь: кто прельстит ахаава царя израилева, да взыдет и падет в рамофе галаадстем? и глаголаше един тако, и ин рече тако: ²⁰ и изыде дух, и ста пред Господем, и рече: аз прельщу его: емуже Господь, в чем, рече, (прельстиши)? ²¹ и рече: изыду и буду дух лжив во устех всех пророков его: рече же (Господь): прельстиши и превозможеши, изыди и сотвори тако: ²² и ныне се, Господь даде духа лжива во уста всем пророком твоим сим, и Господь глагола о тебе злая. ²³ И приступи седекиа сын ханаань, и удари михею в ланиту и рече ему: коим путем пройде дух Господень от мене, еже глаголати к тебе? ²⁴ Рече же михеа: се, узриши в день той, егда внидеши в ложницу из ложницы, да укрыешися. ²⁵ И рече царь израилев: возмите михею, и отведите ко еммиру началнику града и ко иоасу князю сыну цареву, ²⁶ и рцыте: сия глаголет царь: вверзите сего в темницу, и да яст хлеб печали и воду печали, дондеже возвращуся в мире. ²⁷ Рече же михеа: аще возвращаяся возвратишися в мире, не глагола Господь мною. И рече: слышите, вси людие. ²⁸ И взыде царь израилев и иосафат царь иудин в рамоф галаадский. ²⁹ Рече же царь израилев ко иосафату: прикрыюся и вниду во брань, ты же облецыся в ризы моя. И прикрыся царь израилев и вниде во брань. ³⁰ Царь же сирский повеле вождем колесниц своих, глаголя: не устремляйтеся на мала и на велика, но токмо на самаго царя израилева. ³¹ И бысть егда увидеша началницы колесниц иосафата, глаголаша: царь израилев есть сей. И обыдоша его воююще. Иосафат же возопи ко Господу, и Господь послуша его, и отврати их Бог от него. ³² И бысть егда увидеша воеводы колесниц, яко не бяше царь израилев, оставиша его. ³³ И муж наляче лук приметно и порази царя израилева между легким и персями. И рече возатаю своему: обрати руку твою и изведи мя от брани яко изнемогох. ³⁴ И скончана бысть брань в день той, и царь израилев бе стоя на колеснице своей противу сириом даже до вечера, и умре заходящу солнцу.