¹ Сынове же израилевы но числу своему, началницы отечеств, тысящницы и сотницы и книгочии служащии царю, и на всякое слово царево по разделением, и на всякое слово входящаго и исходящаго, месяц от месяца, во вся месяцы лета разделение едино, двадесять четыре тысящы. ² И над первым разделением в первый месяц бысть извоаз сын завдиилов, в разделении его двадесять четыре тысящы: ³ от сынов фаресовых, началник всем князем воинства месяца перваго. ⁴ И над разделением месяца втораго додай екхотский и над разделением его, и макеллоф вождь, и в разделении его двадесять четыре тысящи, князи силы. ⁵ Третий месяца третияго ванеа сын иодаев, иже священник началный, и в разделении его двадесять четыре тысящы: ⁶ сей ванеа крепчайший между тридесятми, и над тридесятми: и над разделением его завад сын его. ⁷ Четвертый месяца четвертаго асаил брат иоавль, и завадиа сын его и братия, и в полце его двадесять четыре тысящы. ⁸ Пятый пятаго месяца началник самаоф сын иезраев, и в полце его двадесять и четыре тысящы. ⁹ Шестый месяца шестаго одуиа сын еккисов фекуитянин, и в полце его двадесять и четыре тысящы. ¹⁰ Седмый месяца седмаго хеллис иже от фалуса, от сынов ефремлих, и в полце его двадесять и четыре тысящы. ¹¹ Осмый месяца осмаго совохай усафитянин, от колена зараина, и в полце его двадесять и четыре тысящы. ¹² Девятый месяца девятаго авиезер, иже от анафофа, от земли вениамини, и в полце его двадесять и четыре тысящы. ¹³ Десятый месяца десятаго меирай, иже от нетофафита, от колена зараина, и в полце его двадесять и четыре тысящы. ¹⁴ Первыйнадесять месяца первагонадесять ванаиа, иже от фарафона, от сынов ефремлих и в полце его двадесять и четыре тысящы. ¹⁵ Вторыйнадесять месяца вторагонадесять холдиа, иже от нетофафита, от колена гофониилева, и в полце его двадесять и четыре тысящы. ¹⁶ И над племены израилевыми, рувиму вождь елиезер, сын зехриев: симеону сафатиа, сын мааха: ¹⁷ левию асавиа, сын камуилев: аарону садок: ¹⁸ иуде елиав от братий давидовых: иссахару амри, сын михаилов: ¹⁹ завулону самаиа, сын авдиев: неффалиму иеримоф, сын озииль: ²⁰ ефрему осий, сын озазиев: полуплемени манассиину иоиль, сын фадеев: ²¹ полуплемени манассиину сущему в земли галаадстей иаддай сын завадиин: сыном вениаминим иасиил, сын авениров: ²² дану азариил, сын иорамов. Сии быша началницы племеном израилевым. ²³ Не хоте же давид счести их от двадесятилетнаго и нижае: зане рече Господь умножити израиля, яко звезды небесныя. ²⁴ Иоав же сын саруиев нача сочитати люди, и не соверши: сего ради бысть гнев Божий на израиля: и не внесеся сочисление в книгу словес царя давида. ²⁵ Над сокровищи же царскими бысть асмоф сын одиилев: и над сокровищи, иже на нивах и в селех, и в весех и в столпех, ионафан сын озиев: ²⁶ и над земледелатели землю делающими ездрай сын хелувов: ²⁷ и над селы семей армафейский: и над сокровищами виноградными замвдиа сын сефамиев: ²⁸ над маслинами же и над черничием, иже бяху на полях, валанан гедоритянин: над сокровищи елеа иоас: ²⁹ над скоты же, иже пасяхуся в сароне, сатрай саронитянин: и над волы, иже во юдолех, софат сын адаин: ³⁰ над велблюды же увиа исмаилтянин: над ослы же иадиа, иже от марафона: ³¹ и над овцами иоас агаритин. Вси тии началницы имений давида царя. ³² Ионафан же дядя давидов (бысть) советник, муж мудр и книжен сый: и иеиль сын ахаманиев бе с сынами царевыми. ³³ Ахитофел советник царев, и хусиа первейший друг царев, ³⁴ и по (нем) ахитофеле бысть (близ)) иодай сын ванеин и авиафар: и иоав началный воевода царев.