¹ И посла хирам царь тирский послы к давиду, и древа кедровл, и здателей стен, и древоделей, да созиждут ему дом. ² И позна давид, яко уготова его Господь царем над израилем, яко воздвижеся в высоту царство его, ради людий его израиля, ³ и поят давид еще жены во Иерусалиме: и родишася ему еще сынове и дщери. ⁴ И сия имена их, иже родишася ему во Иерусалиме: саммаа и совав, нафан и соломон, ⁵ и иеваар и елисуй и елифааф ⁶ и нагеф, и нафаг и иафие, ⁷ и елисама и валиада и елифалет. ⁸ И услышаша иноплеменницы, яко помазан бысть давид в царя над всем израилем, и изыдоша вси иноплеменницы взыскати давида. И услыша давид и изыде противу их. ⁹ Иноплеменницы же приидоша и разлияшася во юдоли исполинов. ¹⁰ И вопроси давид Бога, глаголя: аще взыду на иноплеменники, и предаси ли их в руки моя? И рече ему Бог: взыди, и предам их в руки твоя. ¹¹ И изыде во ваал-фарасин, и порази их тамо давид. И рече давид: разсече Бог враги моя рукою моею, якоже разсечение воды. Сего ради нарече имя месту тому фарасин, разсечение. ¹² И оставиша тамо боги своя иноплеменницы, ихже давид повеле сожещи огнем. ¹³ И приложиша еще иноплеменницы, и разлияшася еще во юдоли исполинов. ¹⁴ И вопроси паки давид Бога. И рече ему Бог: не исходи за ними: отвратися от них, и приидеши на них прямо грушей: ¹⁵ и будет егда услышиши глас шума верхов грушей, тогда изыдеши на брань, яко изыде Бог пред тобою, да поразит полки иноплеменнически. ¹⁶ И сотвори давид, якоже повеле ему Бог: и порази полки филистимов от гаваона даже до газира. ¹⁷ И прославися имя давидово во всех странах, и Господь даде страх его на вся языки.