¹ И бысть в лето третие осии сына илы царя израилева, воцарися езекиа сын ахаза царя иудина: ² сын двадесяти пяти лет бе егда нача царствовати, и двадесять девять леть царствова во Иерусалиме. Имя же матере его авуфа дщи захариина. ³ И сотвори правое пред очима Господнима, по всем елика сотвори отец его давид: ⁴ той разруши высокая, и сокруши вся капища, и искорени дубравы и змию медяную, юже сотвори моисей, яко и до дний тех сынове израилевы беху кадяще ей: и назва имя ей неестан. ⁵ На Господа Бога израилева упова, и но нем не бысть подобен ему в царех иудиных и в бывших прежде его: ⁶ и прилепися Господеви, не отступи от него, и сохрани заповеди его, елики заповеда моисей: ⁷ и бе Господь с ним, и во всех, яже творяше, смысляше. И сопротивися царю ассирийскому и не поработа ему: ⁸ той победи иноплеменники даже до газы и до предел ея, от столпа стрегущих и даже и града тверда. ⁹ И бысть в лето четвертое царя езекии, сие же лето седмое осии, сыну илы, царю израилеву, взыде саламанассар царь ассирийск на самарию и обседе ю, ¹⁰ и взя ю при концы триех лет, в шестое лето езекиево, сие лето девятое осии царя израилева, и пленена бысть самариа. ¹¹ И преведе царь ассирийский самаряны во ассирию, и посади я на алаи и на аворе, реках гозанских, и в пределех мидских: ¹² понеже не послушаша гласа Господа Бога своего и преступиша завет его, вся елика заповеда моисей раб Господень, и не послушаша, и не сотвориша. ¹³ И в четвертоенадесять лето царя езекии, взыде сеннахирим царь ассирийский на грады иудины твердыя и взят я. ¹⁴ И посла езекиа царь иудин послы к царю ассирийску в лахис, глаголя: согреших, возвратися от мене: еже аще возложиши на мя, то понесу. И возложи царь ассирийский на езекию царя иудина триста талант сребра и тридесять талантов злата. ¹⁵ И даде езекиа все сребро обретшееся в дому Господни и в сокровищих дому царева. ¹⁶ Во время оно ссече езекиа царь иудин двери храма Господня и утвержения, яже позлати езекиа царь иудин, и даде их царю ассирийску. ¹⁷ И посла царь ассирийск фарфана и равосаиа и рапсака от лахиса на Иерусалим к царю езекии с силою тяжкою зело. И взыдоша, и приидоша ко Иерусалиму, и сташа у водотечи купели вышния, яже есть на пути села белилнаго, ¹⁸ и возопиша ко езекии. И изыде к ним елиаким сын хелкиев строитель, и сомнас книгочий, и иоас сын сафатов воспоминатель. ¹⁹ И рече к ним рапсак: рцыте ныне ко езекии: сице глаголет царь великий, царь ассирийский: что упование сие, на неже уповаеши? ²⁰ рекл еси: токмо словеса устен, совет и сила на брань: ныне убо на кого надежду отвергл еси мене? ²¹ ныне с, надеешися ты на жезл тростяный сломленый сей, на египет ли? наньже аще опрется муж, внидет в руку его и пронзет ю: тако фараон царь египетский всем надеющымся нань: ²² и аще мне речете: на Господа Бога надеемся: не той ли сей, егоже и отстави езекиа высокая его и жертвенники его, и рече иуде и Иерусалиму: поклонитеся пред жертвенником сим во Иерусалиме? ²³ и ныне соединитеся с господином моим царем ассирийским, и дам тебе две тысящы коней, аще можеши имети всадники на ня: ²⁴ и како отвратиши лице топарха единаго от рабов господина моего малейших, и уповал еси сам на египет, на колесницы и кони? ²⁵ и ныне убо еда без Господа взыдохом на место сие, еже потребити и рече бо Господь ко мне: взыди на землю сию и потреби ю. ²⁶ И рече елиаким сын хелкиин и сомнас и иоас ко рапсаку: глаголи ныне ко отроком твоим сирски, яко слышим мы, а не глаголи к нам иудейски, и почто глаголеши во ушы людий, иже на стене? ²⁷ И рече к ним рапсак: еда к господину твоему и к тебе посла мя господин мой глаголати словеса сия? не к мужем ли седящым на стене, еже ясти им гной свой и пити им сечь свою с вами вкупе? ²⁸ И ста рапсак, и возопи гласом великим иудейски, и глагола, и рече: слышите словеса великаго царя ассирийска: ²⁹ сице глаголет царь: да не возносит вас царь езекиа словесы, понеже не возможет вас изяти из руки моея: ³⁰ и да не обнадеживает вас езекиа Господем, глаголя: изимая измет вы Господь, и не имать предатися град сей в руце царя ассирийска: ³¹ не послушайте езекии, яко сице глаголет царь ассирийский: сотворите со мною благословение и изыдите ко мне, и да пиет муж от винограда своего, и муж вкусит от смоквей своих, и да пиет воду от рова своего, ³² дондеже прииду и поиму вы в землю (такову) якоже земля ваша, земля пшеницы и вина, и хлебов и виноградов, земля масличин елеа и меда, и живи будете и не умрете: и не послушайте езекии, яко прельщает вы, глаголя: Господь ны избавит: ³³ еда избавляюще избавиша бози языков кийждо их свою страну из руки царя ассирийска? ³⁴ где есть бог емафа и арфада? где есть бог сепфаруима, ана и ава? еда избавиша самарию из руку моею? ³⁵ кто во всех бозех земных, иже избавиша земли и от руки моея? и како измет Господь Иерусалима из руки моея? ³⁶ И умолкоша людие и не отвещаша ему слова, яко заповеда им царь глаголя: не отвещайте ему. ³⁷ И вниде елиаким сын хелкиин строитель, и сомнас книгочий, и иоас сын сафатов воспоминатель ко езекии, раздравше ризы своя, и возвестиша ему словеса рапсакова.