¹ В лето седмоенадесять факеа сына ромелиина, воцарися ахаз сын иоафама царя иудина: ² сын двадесяти лет бе ахаз, егда нача царствовати, и шестьнадесять лет царствова во Иерусалиме, и не сотвори правое пред очима Господа Бога своего верно, якоже давид отец его, ³ и ходи в пути иеровоама сына наватова царя израилева, ксему и сына своего преведе сквозе огнь по мерзостем языков, ихже отят Господь от лица сынов израилевых: ⁴ и жряше и кадяше на высоких и на холмех и под всяким древом частым. ⁵ Тогда взыде раассон царь сирск и факей сын ромелиин царь израилев во Иерусалим на брань, и воеваста на ахаза, и не можаста (ему) одолети. ⁶ Во время оно возврати раассон царь сирский елаф сирии и изгна иудеев из елафа, и идумее приидоша во елаф и вселишася тамо даже до дне сего. ⁷ И посла ахаз послы к фелгаффелласару царю ассирийску, глаголя: раб твой и сын твой аз есмь, взыди и отими мя от руки царя сирска и от руки царя израилева, воставших на мя. ⁸ И взя ахаз злато и сребро обретшееся в сокровищих дому Господня и в сокровищих дому царева, и посла царю ассирийску дары. ⁹ И послуша его царь ассирийский: и взыде царь ассирийский в дамаск, и взя его, и пресели его, и раассона царя уби. ¹⁰ И иде царь ахаз на сретение фелгаффелласару царю ассирийску в дамаск, и виде жертвенник в дамасце: и посла царь ахаз ко урии иерею подобие жертвенника, и начертание, и все творение его. ¹¹ И созда уриа иерей жертвенник по всем, елика посла царь ахаз от дамаска. ¹² И прииде царь ахаз из дамаска и виде жертвенник, и взыде на него, ¹³ и покади всесожжение свое и жертву свою и возлияние свое, и пролия кровь мирных на жертвенник, ¹⁴ олтарь же медяный, иже пред Господем, принесе от лица дому Господня, и от среды жертвенника и от среды дому Господня: и постави его о едину страну жертвенника к северу. ¹⁵ И заповеда царь ахаз урии иерею, глаголя: на жертвеннице велицем приношаяй всесожжения утренняя, и жертву вечернюю, и всесожжения царева, и жертву его, и всесожжения всех людий, и жертву их, и возлияния их, и всяку кровь всесожжения, и всяку кровь жертвенную излиеши на нем: олтарь не медян да будет мне на утро. ¹⁶ И сотвори уриа иерей по всем, елика заповеда ему царь ахаз. ¹⁷ И изсече ахаз царь споения подставов, и пренесе от них умывалницу, и море низложи от волов медяных, иже беша под ним, и положи е на подставе каменнем: ¹⁸ и основание седалища создано в дому Господни, и вход царев внешний обрати в дом Господень, от лица царя ассирийска. ¹⁹ И прочая словес ахазовых, елика сотвори, не сия ли написана в книзе словес дний царей иудиных: ²⁰ И успе ахаз со отцы своими, и погребен бысть со отцы своими во граде давидове. И воцарися езекиа сын его вместо его.