¹ И рече елиссей: слышите слово Господне, сице глаголет Господь: якоже час сей, утро мера муки пшеничны будет за сикль един, и две меры ячменя за сикль един во вратех самарии. ² И отвеща тристат, на егоже руку царь почиваше, и рече и елиссею: се, аще отверзет Господь и хляби небесныя, то не будет глагол сей. И елиссей рече: се, ты узриши очима твоима, и оттуду не имаши ясти. ³ И бяху четыре мужа прокажени при вратех града. И рече муж ко искреннему своему: что мы седим зде дондеже умрем? ⁴ аще речем: внидем во град, то глад есть во граде, и умрем тамо: аще же седим зде, то и тако умрем: и ныне идем и внидем в полк сирийский: аще живят ны, живи будем: аще ли умертвят ны, то умрем. ⁵ И восташа в сумраце ити в полк сирийский и внидоша среде полка сирийска, и се, не бе мужа ту. ⁶ И Господь слышан сотвори полку сирийску глас колесниц и глас коней и глас силы великия. И рече муж ко брату своему: се, ныне наял есть на нас царь израилев цари хеттейски и цари египетския приити на ны. ⁷ И восташа, и бежаша в сумраце, и оставиша сени своя и кони своя и ослы своя, якоже быша во стану, и бежаша души ради своея. ⁸ И внидоша прокаженнии сии до среды полка, и внидоша в сень едину, и ядоша и пиша, и взяша оттуду сребро и злато и одежды, и отидоша, и скрыша: и возвратишася, и внидоша в другую сень, и взяша оттуду, и отидоша, и скрыша. ⁹ И рече муж ко искреннему своему: не тако мы творим: день сей день благоговещения есть, мы же молчим и медлим до света утренняго, и обрящем беззаконие: и ныне приидем и внидем, и возвестим в дому цареве. ¹⁰ И внидоша, и возопиша ко вратом града и возвестиша им, глаголюще: внидохом в полк сирийский, и се, не бысть ту мужа, ни гласа человеча, но токмо кони привязани, и ослята, и сени их якоже суть. ¹¹ И возопиша вратницы, и возвестиша в дому цареве внутрь. ¹² И воста нощию царь и рече ко отроком своим: возвещу вам ныне, яже сотвориша нам сириане: разумеша, яко гладни есмы, и изыдоша из стана, и сокрышася на селе, глаголюще: яко изыдут из града, и имем я живы и во град внидем. ¹³ И отвеща един от отрок его и рече: да возмут ныне пять коней оставших, иже осташася зде, се, суть у толикаго множества израилева оставшиися, и послем тамо, и узрим. ¹⁴ И взяша два всадника коней: и посла царь израилев вслед царя сирска, глаголя: идите и видите. ¹⁵ И идоша вслед их даже до иордана, и се, весь путь исполнен одежд и оружия, яже повергоша сириане, внегда устрашится им. И возвратишася посланнии, и возвестиша царю. ¹⁶ И изыдоша людие, и разграбиша весь стан сирский. И бысть мера муки пшеничны за сикль един и две меры ячменя за сикль, по глаголу Господню. ¹⁷ И царь пристави тристата, на егоже руце царь почиваше, у врат: и попраша его людие во вратех, и умре, якоже глагола человек Божий, иже глагола, егда посланный прииде к нему. ¹⁸ И бысть якоже рече елиссей к царю глаголя: две меры ячменя за сикль един, и мера муки пшеничны за сикль: и будет якоже сей час заутра во вратех самарии. ¹⁹ И отвеща тристат елиссею и рече: аще Господь отверзет хляби небесныя, не будет глагол сей. И рече елиссей: се, узриши очима твоима, и оттуду и не имаши ясти.. ²⁰ И бысть тако, и попраша его людие во вратех, и умре.