¹ И бысть внегда взяти Господу илию в вихре яко на небо и идяше илиа и елиссей от галгал. ² И рече илиа ко елиссею: седи убо зде, яко Господь посла мя до вефиля И рече елиссей: жив Господь и жива душа твоя, аще оставлю тя И приидоста в вефиль. ³ И приидоша сынове пророчестии, иже в вефили, ко елиссею и реша к нему: разумееши ли, яко взимает Господь днесь господина твоего верху главы твоея (от тебе)? И рече: и аз уразумех, молчите. ⁴ И рече илиа ко елиссею: сяди убо зде, яко Господь посла мя во иерихон. И рече елиссей: жив Господь и жива душа твоя, аще оставлю тя. И приидоста во иерихон. ⁵ И приближишася сынове пророков, иже во иерихоне, ко елиссею и реша ему: разумееши ли, яко днесь вземлет Господь господина твоего свыше главы твоея (от тебе)? И рече: ибо и аз уразумех, молчите. ⁶ И рече ему илиа: седи зде, яко Господь посла мя до иордана. И рече елиссей: жив Господь и жива душа твоя, аще оставлю тебе. И поидоста оба, ⁷ и пятьдесят мужей от сынов пророческих, и сташа противу издалеча: и сии оба стаста при иордане. ⁸ И прият илиа милоть свою, и свит ю, и удари ею в воду, и разступися вода сюду и сюду: и проидоста оба по суху. ⁹ И бысть преходящема има, и рече илиа ко елиссееви: проси, что сотворю ти прежде неже взят буду от тебе. И рече елиссей: да будет убо дух, иже в тебе, сугуб во мне. ¹⁰ И рече илиа: ожесточил еси просити: аще узриши мя вземлема от тебе, будет ти тако: аще ли не (узриши), и будет. ¹¹ И бысть идущема има, идяста и глаголаста: и се, колесница огненная и кони огненнии, и разделиша между обема. И взят бысть илиа вихром яко на небо. ¹² И елиссей зряше и вопияше: отче, отче, колесница израилева и конница его. И не увиде его ктому: и ятся (елиссей) за ризы своя, и растерза я в два растерзания, ¹³ и взя милоть илину елиссей падшую верху его, и возвратися елиссей, и ста на брезе иорданове. ¹⁴ И прият (елиссей) милоть илиину, яже паде верху его, и удари в воду, и не разступися вода. И рече: где Бог илиин аффо? И удари елиссей воды (вторицею), и разступишася сюду и сюду, и прейде елиссей по суху. ¹⁵ И видеша его сынове пророчестии, иже во иерихоне сопротив, и реша: почи дух илиин на елиссеи. И приидоша на сретение ему и поклонишася ему до земли, ¹⁶ и реша к нему: се, ныне со отроки твоими пятьдесят мужей сынов сильных: шедше да взыщут господина твоего, еда како дух Господень взя, и поверже его на иордане, или на единей от гор, или на единем от холмов и рече елиссей: не посылайте. ¹⁷ И принудиша его, и дондеже устыдеся, и рече: послите. И послаша пятьдесят мужей, и искаша три дни, и не обретоша его, ¹⁸ и возвратишася к нему: и той седяше во иерихоне. И рече елиссей к ним: не глаголах ли к вам, не идите? ¹⁹ И реша мужие града ко елиссею: се, жилище града благо, якоже ты, господине, видиши, но воды злы и земля неплодна. ²⁰ И рече елиссей: принесите ми водонос нов, и всыплите в онь соль. И взяша, и принесоша к нему. ²¹ И изыде елиссей на исходища водная, и всыпа ту соль, и рече: сице глаголет Господь: изцелих воды сия, не будет от них ктому смерти и неплодства. ²² И изцелеша воды до дне сего, по глаголу елиссееву, егоже глагола. ²³ И взыде оттуду во вефиль. И восходящу ему путем, и дети малы изыдоша из града, и ругахуся ему, и реша ему: гряди, плешиве, гряди. ²⁴ И озреся вслед их, и виде я, и проклят я именем Господним. И се, изыдоша две медведицы из дубравы и растерзаша от них четыредесять два отрочища. ²⁵ И иде оттуду в гору кармилскую, и оттуду возвратися в самарию.