¹ Во время оно разболеся авиа сын иеровоамль. ² И рече иеровоам к жене своей: востани и измени ризы своя, да не познают, яко ты жена иеровоамова, и иди в силом: се бо, тамо ахиа пророк: той глагола мне еже царствовати над людьми сими: ³ и возми в руце твои человеку Божию десять хлебов, и опресноки чадом его, и гроздие и сосуд меда, и иди к нему: той возвестит ти, что будет отрочати. ⁴ И сотвори тако жена иеровоамля: и воста и иде в силом, и вниде в дом ахиин: человек же стар бяше еже видети, и притупистася очи его от старости его. ⁵ И рече Господь ко ахии: се, жена иеровоамова входит вопрошати тя о сыне своем, яко болезнует: по сему и по сему да глаголеши к ней. И бысть внегда внити ей, и она странноявляшеся. ⁶ И бысть егда услыша ахиа шум ног ея, входящей ей во врата, и рече: вниди, жено иеровоамова, почто ты тако странноявляешися? аз бо есмь посланник к тебе жесток: ⁷ шедши рцы иеровоаму: сия глаголет Господь Бог израилев: понеже толико вознесох тя от среды людий, и дах тя вожда над людьми моими израилем, ⁸ и раздрах царство от дому давидова, и дах е тебе, ты же не был еси якоже раб мой давид, иже сохрани заповеди моя, и иже хождаше вслед мене всем сердцем своим, еже творити всякую правоту пред очима моима, ⁹ и излукавствовал еси, еже творити паче всех елицы быша пред лицем твоим, и пошел еси и сотворил еси себе боги чужды и слияны, еже раздражити мя, и отвергл мя еси назад себе: ¹⁰ сего ради се, аз навожду злая на дом иеровоамов, и потреблю иеровоамля мочащаго к стене, держащагося и оставленаго во израили, и истреблю дом иеровоамов, якоже истребляется гной, дондеже скончатися ему: ¹¹ умерших иеровоамлих во граде снедят пси, и умершаго на селе снедят птицы небесныя, яко Господь глагола: ¹² ты же воставши иди в дом твой: внегда входити ногама твоима во град, умрет детищь, ¹³ и восплачется по нем весь израиль, и погребут его, яко той един внидет иеровоаму во гроб, яко обретеся в нем глагол благ о Господе Бозе израилеве в дому иеровоамли: ¹⁴ и возставит Господь себе царя над израилем, иже поразит дом иеровоамов в сей день: а что, и ныне? ¹⁵ и поразит Господь Бог израиля, якоже колеблется трость на воде: и истребит израиля свыше земли благия сея, юже даде отцем их, и завеет их за ону страну реки, понеже сотвориша дубравы своя, прогневляюще Господа, ¹⁶ и предаст Господь израиля за грехи иеровоамли, иже согреши и иже во грех введе израиля. ¹⁷ И воста жена иеровоамля и прииде во сариру. И бысть егда вниде в преддверие дому, и детищь умре. ¹⁸ И погребоша его, и плакашася его весь израиль по словеси Господню, еже глагола рукою раба своего ахии пророка. ¹⁹ И останок словес иеровоамовых, елика ратоваше и елика царствоваше, се, сия написана в книзе словес дний царей израилевых. ²⁰ И дние, в нихже царствова иеровоам, двадесять два лета: и успе со отцы своими, и воцарися нават сын его вместо его. ²¹ Ровоам же сын соломонов царствова над иудою: бе четыредесяти и единаго лета, егда нача царствовати, и седмьнадесять лет царствова во Иерусалиме граде, егоже избра Господь положити имя свое тамо от всех племен израилевых. И имя матере его наама амманитяныня. ²² И сотвори ровоам лукавое пред Господем: и раздражи его о всех, яже сотвориша отцы их, о гресех их, имиже согрешиша: ²³ и создаша сии себе высокая, и столпы, и капища на всяцем холме высоцем и под всяцем древом сеновным: ²⁴ и смешение бе в земли их, и сотвориша от всех мерзостей языческих, яже отя Господь от лица сынов израилевых. ²⁵ И бысть в лето пятое царствующаго ровоама, взыде сусаким царь египетский на Иерусалим ²⁶ и взя вся сокровища дому Господня и сокровища дому царева, и копия златая, яже взя давид из руки отроков адраазара царя сувскаго и внесе я во Иерусалим: вся сия взя, и щиты златыя, яже сотвори соломон, и внесе я во египет. ²⁷ И сотвори царь ровоам щиты медяныя вместо тех, и постави над ними властели от предходящих пред ним, иже храняху врата дому царева: ²⁸ и бысть егда вхождаше царь в дом Господень, и ношаху оныя предходящии, и паки возвращаху тыя во оружехранилище предходящих. ²⁹ Прочая же словес ровоамлих, и вся яже сотвори, не се ли, сия писана суть в книзе словес дний царства иудина? ³⁰ И брань бе между ровоамом и между иеровоамом во вся дни. ³¹ И успе ровоам со отцы своими, и погребен бысть со отцы своими во граде давидове. И воцарися авиа сын его вместо его.