¹ И бе царь соломон царствуяй над израилем. ² И сии старейшины иже беша с ним: ³ азариа сын садоков, жрец: елиаф и ахиа сынове сивины, книгочии: и иосафат сын ахилудов, напоминатель: ⁴ и ванеа сын иодаев над силою: и садок и авиафар, иерее: ⁵ и азариа сын нафань над настоятелми: и завуф сын нафань друг царев: ⁶ и ахисар бе строитель, и елиав сын сафатов над отечеством: и адонирам сын авдонов над даньми. ⁷ И у соломона бяху дванадесять приставник над всем израилем, еже подаяти царю и дому его: по месяцу в лете бываше един, еже подаяти, ⁸ и сия имена их: вен сын оров на горе ефремли, един: ⁹ сын дакарь во махемате и во висаламине и вефсамисе и елоне, даже до вефанана, един: ¹⁰ сын седов во аравофе, сего сохо и вся земля оферова: ¹¹ сына аминадавля вся неффадор: тефаф дщи соломоня бе ему в жену, един: ¹² вана сын ахилуфов во ифаанахе и магеддо и весь дом саныи, иже при сесафане под езраелем, и от вифсана даже до савелмаула, даже до маевер лукам, един: ¹³ сын наверов в равофе галаадстем: сему область ергав в васане, шестьдесят градов великих огражденных стенами, и вереи медяны, един: ¹⁴ ахинадав сын саддов во маанаиме: ¹⁵ ахимаас в неффалиме: и сей поят васемафу дщерь соломоню в жену, един: ¹⁶ ваана сын хусиин во асире и во ваалофе, един: ¹⁷ иосафат сын фаруев во иссахаре, ¹⁸ семей сын илы во вениамине, ¹⁹ гавер сын адаев в земли галааде, в земли сиона царя есевонска и ога царя васанска, и насиф един в земли иудове. ²⁰ Иуда и израиль мнози аки песок иже при мори во множестве, ядуще и пиюще и веселящеся. ²¹ И соломон бе началствуяй во всех царствах, от реки земли филистимския и даже до предел египетских, (и бяху) приносяще дары и работающе соломону во вся дни живота его. ²² И сия потребная соломону в день един: тридесять мер муки семидалныя и шестьдесят мер муки смешаныя, ²³ десять телцев избранных и двадесять волов тучных и сто овец, кроме еленей и серн и птиц, избранна от избранных тучна. ²⁴ Понеже бе началствуяй во всех об он пол реки от фапсы и даже до газы, над всеми царми об он пол реки, и мир бе ему от всех стран окрест. ²⁵ И живяху иуда и израиль безпечально, кийждо под виноградом своим и под смоковницею своею, ядуще и пиюще, от дана и даже до вирсавии, во вся дни соломона. ²⁶ И бяше у соломона четыредесять тысящ кобылиц в колесницы и двадесять тысящ конник. ²⁷ И тако подаяху приставники царю соломону, и вся повеленная на трапезу цареву, кийждо в месяц свой, не пременяюще словесе: ²⁸ и ячмень и плевы конем, и колесницами привозяху на место, идеже бе царь, кийждо по чину своему. ²⁹ И даде Господь смысл и мудрость соломону многу зело, и широту сердца, яко песок иже при мори: ³⁰ и умножися мудрость соломонова зело, паче смысла всех древних человек и паче всех смысленных египетских: ³¹ и умудрися паче всех человек, и умудрися паче гефана езраилитнна и емана, и халкада и дарды, сына самадова, и прославися имя его во всех странах окрест. ³² И изглагола соломон три тысящы притчей, и быша песни его пять тысящ: ³³ и глагола о древех, от кедра иже в ливане и даже до иссопа исходящаго из стены: и глагола о скотех и о птицах и о гадех и о рыбах. ³⁴ И прихождаху вси людие слышати премудрость соломоню: и приимаше дары от всех царей земных, елицы слышаху премудрость его.