¹ И приложи Господь гневу разгоретися во израили, и подвиже в них давида, глаголя: иди и изочти израиля и иуду. ² И рече царь ко иоаву князю силы иже с ним: пройди ныне вся колена израилева и иудина, от дана даже и до вирсавии, и сочти люди, и да увем число людем. ³ И рече иоав ко царю: да приложит Господь Бог твой к людем твоим, якоже быти им сторицею, и очи господина моего царя да увидят: и господин мой царь почто помышляет о словеси сем? ⁴ И превозможе слово царево ко иоаву и ко князем силы. И изыде иоав и князи крепости пред царем сочести люди израилевы. ⁵ И преидоша иордан, и ополчишася во ароире одесную града иже посреде дебри гад и елиезер. ⁶ И приидоша в галаад и в землю фавасон и истон и в дасу, и внидоша в данидан и обыдоша сидон, ⁷ и приидоша во мапсар тирский и во вся грады евеины и в хананеины, и идоша на юг иуды в вирсавию, ⁸ и обыдоша всю землю, и приидоша во Иерусалим, скончавше девять месяц и двадесять дний. ⁹ И даде иоав число сочтеных людий царю: и бе израиля числом осмь сот тысящ сильных держащих оружие, и мужей иудиных пять сот тысящ мужей борцев. ¹⁰ И убояся сердце давидово по счислении людий, и рече давид ко Господу: согреших зело, яко сотворих глагол сей: и ныне, Господи, отими беззаконие раба твоего, яко обуях зело. ¹¹ И воста давид заутра: и слово Господне бысть ко гаду пророку прозорливцу, глаголя: ¹² иди и рцы давиду, глаголя: тако глаголет Господь: трое аз наведу на тя, и избери себе едино от сих, и сотворю ти. ¹³ И вниде гад к давиду, и поведа, и рече ему: избери себе быти: или приидут тебе три лета глада на землю твою: или три месяцы бегати имаши пред враги твоими, и будут гоняще тя: или три дни быти смерти в земли твоей: ныне убо разумей и виждь, что отвещаю пославшему мя. ¹⁴ И рече давид ко гаду: тесна ми суть отвсюду зело три сия: да впаду убо в руце Господни, яко многи суть щедроты его зело: в руце же человечи да не впаду. И избра себе давид смерть и дни жатвенныя пшеницы. ¹⁵ И даде Господь смерть во израили от утра до часа обедняго, и начася язва быти в людех, и умроша от людий Господних от дана и до вирсавии седмьдесят тысящ мужей. ¹⁶ И простре ангел Божий руку свою на Иерусалим погубити его, и раскаяся Господь о зле, и рече ангелу погубляющему люди: доволно ныне, отими руку твою. И ангел Господнь бе стоя пред гумном орны иевусеанина. ¹⁷ И рече давид ко Господу, егда виде ангела биюща люди, и рече: се, аз есмь согрешивый, аз есмь пастырь зло сотворивый, а сии овцы что сотвориша? да будет ныне рука твоя на мне и на дому отца моего. ¹⁸ И прииде гад к давиду в день той и рече ему: взыди, и постави Господеви олтарь на гумне орны иевусеанина. ¹⁹ И взыде давид по глаголу гада пророка, имже образом заповеда ему Господь. ²⁰ И преклонися орна, и виде царя и отроки его восходящыя выше его, и изыде орна, и поклонися царю на лицы своем на земли, ²¹ и рече орна: что яко прииде господин мой царь к рабу своему? И рече давид: купити у тебе гумно (приидох), на создание олтаря Господня, и престанет язва от людий. ²² И рече орна к давиду: да приимет и вознесет господин мой царь Господу (Богу) еже благо пред очима его: се, волове во всесожжение, и колеса и сосуди волов на дрова. ²³ Вся даде орна царю. И рече орна к царю: Господь Бог твой да благословит тя. ²⁴ И рече царь ко орне: ни, но токмо купуя куплю от тебе ценою, и не вознесу Господу Богу моему всесожжения туне. И купи давид гумно и волы на пятидесяти сиклех сребра. ²⁵ И созда тамо давид олтарь Господеви: и вознесе всесожжения и мирная. И приложи соломон ко олтарю последи, зане мал бе прежде. И послуша Господь земли, и отят язву от израиля.