¹ И рече ахитофел ко авессалому: изберу ныне себе дванадесять тысящ мужей и востану, и пожену вслед давида нощию, ² и найду на него, и той утружден и ослаблен руками, и устрашу его, и побежат вси людие иже с ним, и убию царя единаго: ³ и возвращу вся люди к тебе, имже образом обращается невеста к мужеви своему: ты бо токмо души единаго мужа ищеши, всем же людем будет мир. ⁴ И угодно слово бысть пред очима авессаломлима и пред очима всех старейшин израилевых. ⁵ И рече авессалом: призовите же и хусиа арахиина, и услышим что из уст его. ⁶ И вниде хусий ко авессалому, и рече авессалом к нему, глаголя: по глаголу сему глагола ахитофел: сотворим ли по словеси его? аще же ни, ты глаголи. ⁷ И рече хусий ко авессалому: не благ совет сей, егоже совеща ахитофел единою сие. ⁸ И рече хусий: ты веси отца твоего и мужей его, яко сильни суть зело, и гневливи душами своими, яко медведица чад лишеная на селе, и аки вепрь свирепый на поли: и отец твой муж борец, и не даст почити людем: ⁹ се бо, той ныне скрыся на некоторем холме или на некоторем месте: и будет внегда напасти на них в начале, и услышит слушаяй, и речет: бысть сокрушение в людех иже за авессаломом: ¹⁰ и той сын силы, емуже сердце якоже сердце льву таящо истает: понеже весть весь израиль, яко силен отец твой, и сынове силы вси иже с ним: ¹¹ тако советуя аз усоветовах, и собираяся соберется к тебе весь израиль от дана и до вирсавии, аки песок иже при мори во множестве, и лице твое идущее посреде их: ¹² и приидем к нему на едино место, идеже обрящем его тамо, и ополчимся на него, якоже спадает роса на землю, и не оставим в нем и в мужех его иже с ним ни единаго: ¹³ и аще во град соберутся, и возмет весь израиль ко граду тому ужы, и совлечем его в поток, дондеже не останется тамо ниже камень. ¹⁴ И рече авессалом и вси мужие израилтестии: благ совет хусиа арахиина паче совета ахитофелева. И Господь заповеда разорити совет ахитофелев благий, яко да наведет Господь на авессалома злая вся. ¹⁵ И рече хусий арахиин ко садоку и авиафару иереем: тако и тако советова ахитофел авессалому и старейшинам израилевым: и аз тако и тако советовах: ¹⁶ и ныне послите скоро и возвестите давиду, глаголюще: не пребуди нощь сию во аравофе пустыни, но пойти потщися, да не како пожерт будет царь и вси людие иже с ним. ¹⁷ И ионафан и ахимаас стояста на студенце рогили, и иде рабыня и поведа има: и тии идоста и возвестиста давиду царю, яко не могоста явитися еже внити во град. ¹⁸ И виде их отрочищь и поведа авессалому. И идоста оба скоро и приидоста в дом мужа в ваурим: и тому ров на дворе, и снидоста тамо. ¹⁹ И взя жена, и положи покров на устии рова, и суши на нем арафоф, и не познася глагол. ²⁰ И приидоша отроцы авессаломли к жене в дом и реша: где ахимаас и ионафан? И рече им жена: преидоста вмале воду. И искаша, и не обретоша, и возвратишася во Иерусалим. ²¹ Бысть же по отшествии их, и излезоста из рова, и идоста, и возвестиста давиду царю и глаголаста ему: востаните, и прейдите скоро воду, яко сице совеща на вы ахитофел. ²² И воста давид и вси людие иже с ним и преидоша иордан до света заутра, и ни един не оста, иже бы не прешел иордана. ²³ И ахитофел виде, яко не сбыстся совет его, и оседла осля свое, и воста, и отиде в дом свой, во град свой: и заповеда дому своему, и удавися, и умре, и погребен бысть во гробе отца своего. ²⁴ И давид прейде в манаим, авессалом же прейде иордан сам и вси мужие израилтестии с ним. ²⁵ И амессая постави авессалом вместо иоава над силою: амессай же сын мужа, емуже имя иефер иезраилитин, сей вниде ко авигеи дщери иессеине, сестре саруии матере иоавли. ²⁶ И ополчися авессалом и весь израиль в земли галаадстей. ²⁷ И бысть егда вниде давид в манаим, и уесвий сын наасов от раввафа сынов аммоних, и махир сын амииль иже из лодавара, и верзеллий галаадитин из рогеллима, ²⁸ принесоша десять постель устроеных и конобов десять и сосуды скуделны и пшеницу и ячмень и муку и пшено и боб и сочевицу ²⁹ и мед и масло и овцы и сыры кравия, и принесоша давиду и людем иже с ним ясти: быша бо людие гладни и утруждени и жаждни в пустыни.