¹ И бысть по сих, и у авессалома сына давидова бе сестра добра взором зело, имя же ей фамарь, и возлюби ю амнон сын давидов: ² и скорбяше амнон, яко и разболетися (ему) сестры своея ради фамары, зане дева бяше сия, и не удобно бе пред очима амнонима что сотворити ей. ³ И бе амнону друг, имя же ему ионадав, сын самаа брата давидова, и ионадав муж мудр зело. ⁴ И рече ему (ионадав): что ти, яко ты тако болиши, сыне царев, утро утро? и не возвещаеши ми? И рече ему амнон: фамару сестру авессалома брата моего аз люблю. ⁵ И рече ему ионадав: лязи на постели твоей и разболися, и внидет отец твой видети тя, и речеши к нему: да приидет ныне фамарь сестра моя, и да ми даст ясти, и да сотворит пред очима моима снедь, да увижду и вкушу от рук ея. ⁶ И ляже амнон и разболеся: и вниде царь видети его. И рече амнон к царю: да приидет ныне фамарь сестра моя ко мне и да испечет два пряжма пред очима моима, и имам ясти от руку ея. ⁷ И посла давид к фамаре в дом, глаголя: иди ныне в дом амнона брата твоего и сотвори ему снедь. ⁸ И иде фамарь в дом амнона брата своего, и той лежаше. И взя тесто, и смеси, и устрои пред очима его, и испече пряжма: ⁹ и взя сковраду и изложи пред него, и не восхоте ясти. И рече амнон: изжените вся мужы от мене. И изгнаша вся мужы от него. ¹⁰ И рече амнон к фамаре: внеси ми снедь во внутреннюю храмину, и ям от руку твоею. И взя фамарь пряжма, яже испече, и внесе амнону брату своему во внутреннюю храмину, ¹¹ и представи ему да яст. И ят ю, и рече ей: гряди, лязи со мною, сестро моя. ¹² И рече ему: ни, брате мой, не обругай мене, понеже не сотворится тако во израили, не сотвори безумия сего: ¹³ и аз камо скрыю безчестие мое? и ты будеши яко един от безумных во израили: и ныне глаголи к царю, да не отлучит мене от тебе. ¹⁴ И не восхоте амнон послушати гласа ея, и преодоле ей, и смири ю, и преспа с нею. ¹⁵ И возненавиде ю амнон ненавистию великою зело, яко велиим ненавидением возненавиде ю паче любве, еюже любляше ю, и рече ей амнон: востани и отиди. ¹⁶ И рече ему фамарь: (ни, брате,) яко злоба болши есть последняя паче первыя, юже сотворил еси со мною, еже отслати мене. И не восхоте амнон слышати гласа ея. ¹⁷ И призва отрока своего, приставника дому своего, и рече ему: отсли ныне сию от мене вон, и заключи двери вслед ея. ¹⁸ И бе риза на ней испещрена, понеже тако облачахуся дщери царевы, сущыя девицы, во одежды своя. И изведе ю вон слуга его и затвори двери вслед ея. ¹⁹ И взя фамарь пепел, и насыпа на главу свою, и одежду испещренную растерза на себе, и возложи руце свои на главу свою, и идущи идяше и вопияше. ²⁰ И рече к ней авессалом брат ея: еда амнон брат твой бысть с тобою? и ныне, сестро моя, умолчи, яко брат твой есть: не полагай на сердцы твоем еже глаголати слово сие. И седе фамарь вдовствующи в дому авессалома брата своего. ²¹ И слыша царь давид вся словеса сия, и разгневася зело, и не опечали духа амнона сына своего, понеже любляше его, яко первенец бе ему. ²² И не глагола авессалом со амноном ни о добре, ни о зле, понеже возненавиде авессалом амнона того ради, понеже фамару сестру его обругал. ²³ И бысть по двух летех дний, и беша стригуще (овцы) авессаломовы (раби) в веласоре близ ефрема: и призва авессалом вся сыны царевы. ²⁴ И прииде авессалом ко царю и рече: се, ныне стригут рабу твоему, да идет убо царь и отроцы его с рабом твоим. ²⁵ И рече царь ко авессалому: ни, сыне мой, да не пойдем вси мы, и да не отяготим тя. И нуждаше его: и не восхоте (царь) ити, и благослови его. ²⁶ И рече авессалом к нему: аще же ни, поне да идет с нами амнон брат мой. И рече ему царь: почто идет с тобою амнон? ²⁷ И принуди его авессалом, и отпусти с ним амнона и вся сыны царевы. И сотвори авессалом пир, якоже творит пир царь. ²⁸ И заповеда авессалом отроком своим, глаголя: видите егда возблажает сердце амноне от вина, и реку вам: поразите амнона, и умертвите его: не убойтеся, яко не аз ли есмь повелеваяй вам? мужайтеся и будите в сыны силы. ²⁹ И сотвориша отроцы авессаломли амнону, якоже заповеда им авессалом. И восташа вси сынове царевы, и вседе кийждо на мска своего, и бежаша. ³⁰ И бысть, сущым им на пути, и слух дойде до давида, глаголя: изби авессалом вся сыны царевы, и не избысть от них ни един. ³¹ И воста царь, и растерза ризы своя, и ляже на земли, и вси отроцы его предстоящии ему растерзаша ризы своя. ³² И рече ионадав, сын самаа брата давидова, и рече: да не речет господин мой царь, яко вся отроки сыны царевы уби, но амнон есть един убиен, яко той из уст авессалому не исхождаше, отнележе обруга сестру его фамару: ³³ и ныне да не полагает господин мой царь словесе на сердцы своем, глаголя: вси сынове царевы умроша: яко амнон един умре. ³⁴ И побеже авессалом. И воздвиже отрок страж очеса своя и виде: и се, людие мнози идуще путем вслед его со страны гор в низхождение. И прииде страж и возвести царю и рече: мужы видех от пути оронска со страны горы. ³⁵ И рече ионадав ко царю: се, сынове царевы приходят: по словеси раба твоего, тако бысть. ³⁶ И бысть егда сконча глаголя, и се, сынове царевы приидоша и воздвигоша глас свой и плакаша: и сам царь и вси отроцы его плакаша плачем великим зело. ³⁷ И авессалом убеже, и прииде ко фолму сыну емиуда, царю гедсурску, в землю хамаахадску. И плакаше давид царь о сыне своем вся дни. ³⁸ И авессалом убеже, и иде в гедсур, и бе тамо три лета. ³⁹ И остави царь давид изыти вслед авессалома, яко утешися о амноне, яко умре.