¹ И собра давид еще всякаго юношу от израиля, яко седмьдесят тысящ. ² И воста и иде давид и вси людие, иже с ним, и от князей иудиных, на восход, еже вознести оттуду кивот Божий, над нимже призвася имя Господа сил, седящаго на херувимех над ним: ³ и возложиша кивот Господень на колесницу нову, и отвезоша его из дому и аминадавля иже на холме: оза же и братия его сынове аминадавли везяху колесницу с кивотом (Господним): ⁴ и братия его идяху пред кивотом (Божиим), ⁵ давид же и сынове израилевы (идяху) пред Господем, играюще во органы устроенныя в крепости, и в пениих и в гуслех, и в свирелех и в тимпанех, и в кимвалех и в цевницах, ⁶ и приидоша до гумна нахорова. И простре оза руку свою на кивот Божий придержати его, и ятся за него, понеже превращаше его телец. ⁷ И разгневася гневом Господь на озу и порази его тамо Бог, и умре тамо у кивота Господня пред Богом. ⁸ И опечалися давид, понеже порази Господь поражением озу: и наречеся место то поражение озино и до сего дне. ⁹ И убояся Господа давид в день той, глаголя: како внидет ко мне кивот Господень? ¹⁰ И не хотяше давид, да приидет к нему кивот завета Господня во град давидов: и уклони его давид в дом аведдара гефеанина. ¹¹ И стояше кивот Господень в дому аведдара гефеанина месяцы три, и благослови Господь весь дом аведдаров и вся, яже его. ¹² И возвестиша царю давиду, глаголюще: благослови Господь дом аведдаров и вся, яже его, кивота ради Божия. И иде давид, и взя кивот Божий из дому аведдарова во град давидов в веселии: ¹³ и беша с ним несуще кивот Господень седмь ликов, и жертва телец и агнцы: ¹⁴ и давид бряцаше во органы устроены пред Господем, и оболчен бысть давид во одежду изящну: ¹⁵ и давид и весь дом израилев несяху кивот Господень с воплем и со гласом трубным. ¹⁶ И бысть кивоту приносиму ко граду давидову, и мелхола дщи саулова приницаше оконцем и виде царя давида скачуща и играюща пред Господем, и уничижи его в сердцы своем. ¹⁷ И внесоша кивот Господень, и поставиша его на месте его посреде скинии, юже постави ему давид: и вознесе давид всесожигаемая пред Господа и мирная, ¹⁸ и соверши давид возносяй всесожжения и мирная, и благослови люди о имени Господа сил, ¹⁹ и раздели всем людем на всю силу израилеву от дана даже до вирсавии, и от мужа даже до жены, коемуждо по укруху хлеба, и по части печенаго мяса, и по сковрадному млину. И отидоша вси людие, кийждо в дом свой. ²⁰ И возвратися давид благословити дом свой, и изыде мелхола дщи саулова на сретение давиду, и благослови его и рече: коль прославися днесь царь израилев, иже открыся днесь пред очима рабынь рабов своих, якоже открывается открывшийся един от пляшущих? ²¹ И рече давид к мелхоле: пред Господем плясати буду: и благословен Господь, иже избра мя паче отца твоего и паче всего дому его, поставити мя властелина над людьми своими над израилем, и буду играти и плясати пред Господем: ²² и открыюся еще такожде и буду непотребен пред очима твоима, и с рабынями, о нихже рекла еси, непрославлену быти ми. ²³ И у мелхолы дщере саули не бысть детища до дне смерти ея.