¹ И приложиша еще сынове израилевы творити зло пред Господем: и предаде я Господь в руку филистимску четыредесять лет. ² И бяше муж един от сараи, от племене данова, имя же ему маное: и жена ему бяше неплоды и не раждаше. ³ И явися ангел Господень к жене и рече к ней: се, ты неплоды и не раждала еси, и зачнеши и родиши сына: ⁴ и ныне блюдися, и не пий вина и сикера, и не яждь всякаго нечистаго: ⁵ яко се, ты во утробе приимеши и родиши сына: и железо на главу его не взыдет, яко назорей Богови будет сие отроча от чрева: и сей начнет спасати израиля из руки филистимли. ⁶ И вниде жена и рече мужу своему, глаголющи: человек Божий прииде ко мне, и образ его яко образ ангела Божия, страшен зело: и вопрошах его, откуду еси? и имене своего не поведа ми, ⁷ и рече мне: се, ты во утробе зачнеши и родиши сына: и ныне не пий вина, ни сикера, и не яждь всякаго нечистаго, яко назорей Богу будет отрочищь от утробы даже до дне смерти своея. ⁸ И помолися маное ко Господу и рече: во мне, Господи, человек Божий, егоже послал еси, да приидет еще к нам и наставит ны, что сотворим отрочати раждающемуся. ⁹ И послуша Бог молитвы маноевы: и прииде паки ангел Божий к жене, сия же седяше на селе, и маное муж ея не бяше с нею. ¹⁰ И потщася жена, и текши скоро поведа мужу своему, и рече к нему: се, явися мне муж, иже приходил в день он ко мне. ¹¹ И востав иде маное вслед жены своея, и прииде к мужу и рече ему: ты ли еси муж глаголавый к жене (моей)? И рече ангел: аз. ¹² И рече маное: ныне убо да приидет слово твое, кий будет суд отрочате, и что дела его? ¹³ И рече ангел Господень к маною: от всех, яже глаголах к жене, да сохранится: ¹⁴ от всего, еже исходит из винограда, да не яст, и вина и сикера да не пиет, и всякаго нечистаго да не яст: и вся, елика заповедах ей, да хранит. ¹⁵ И рече маное ко ангелу Господню: да удержим тя зде, и сотворим пред тобою козлище от коз. ¹⁶ И рече ангел Господень к маною: аще мя понудиши, не буду ясти хлеба твоего: но аще сотвориши всесожжение Господеви, то вознеси е. Не ведяше бо маное, яко ангел Господень той. ¹⁷ И рече маное ко ангелу Господню: что имя твое? да егда сбудется слово твое, прославим тя. ¹⁸ И рече ему ангел Господень: почто сие вопрошаеши имене моего? и то есть чудно. ¹⁹ И взя маное козлища от коз и жертву, и вознесе на камень Господеви чудная творящему: маное же и жена его зряста. ²⁰ И бысть егда пламень взыде выше олтаря даже до небесе, и взыде ангел Господень в пламени олтаря: маное же и жена его смотряста, и падоста лицем своим на землю. ²¹ И не приложи ктому ангел Господень явитися маною и жене его. Тогда уведе маное, яко ангел Господень есть. ²² И рече маное к жене своей: смертию умрем, яко Бога видехом. ²³ И рече ему жена его: аще бы хотел Господь умертвити нас, не бы взял от рук наших всесожжения и жертвы, и не бы показал нам сих всех, и не бы слышана сия сотворил нам якоже ныне. ²⁴ И роди жена сына, и нарече имя ему сампсон. И возмужа отроча, и благослови е Господь: ²⁵ и нача дух Господень ходити с ним в полце данове, посреде сараи и посреде есфаола.