¹ И бяше иеффай галаадитянин силен крепостию: и той бысть сын жены блудницы, яже роди галааду иеффая. ² И роди жена галаадова сынов ему: и возмужаша сынове жены и изгнаша иеффая, и рекоша ему: не наследиши в дому отца нашего, яко сын жены блудныя еси ты. ³ И отбеже иеффай от лица братии своея и вселися в земли тов: и собирахуся ко иеффаю мужие праздни, и хождаху с ним. ⁴ И бысть по днех сих, и воеваша сынове аммони на израиля. ⁵ И егда воеваша сынове аммони на израиля, и поидоша старейшины галаадовы пояти иеффая от земли тов, ⁶ и рекоша ко иеффаю: прииди и буди нам началник, и ополчимся на сыны аммони. ⁷ И рече иеффай старейшинам галаадским: не вы ли возненавидесте мя, и изгнасте мя из дому отца моего, и отпустисте мя от себе? и почто приидосте ко мне ныне, егда нужду возиместе? ⁸ И рекоша старейшины галаадстии ко иеффаю: сего ради ныне приидохом к тебе, да пойдеши с нами, и ополчимся на сыны аммони: и будеши нам князь всем живущым в галааде. ⁹ И рече иеффай ко старейшинам галаадовым: аще возвращаете мя ополчитися на сыны аммони, и предаст их Господь предо мною, и аз вам буду ли князь? ¹⁰ И рекоша старейшины галаадстии ко иеффаю: Господь да будет послух между нами, аще по слову твоему тако не сотворим. ¹¹ И пойде иеффай со старейшинами галаадскими, и поставиша его людие над собою главу и князя: и глагола иеффай вся словеса своя пред Господем в массифе. ¹² И посла иеффай послы к царю сынов аммоних, глаголя: что мне и тебе, яко пришел еси ко мне воевати на земли моей? ¹³ И рече царь сынов аммоних к послом иеффаевым: яко взя израиль землю мою, егда изыде из египта, от арнона даже до иавока и до иордана: и ныне возврати ю с миром, и отиду. ¹⁴ И возвратишася послы ко иеффаю. И приложи еще иеффай, и посла послы к царю сынов аммоних, и рекоша ему: ¹⁵ тако глаголет иеффай: не взя израиль земли моавли и земли сынов аммоних, ¹⁶ понеже егда исхождаше из египта, пойде израиль по пустыни до моря чермнаго, и прииде до кадиса: ¹⁷ и посла израиль послы к царю едомску, глаголя: да прейду сквозе землю твою: и не послуша царь едомск: такожде посыла и к царю моавску, и не восхоте: и седе израиль в кадисе: ¹⁸ и иде пустынею, и обыде землю едомлю и землю моавлю, и прииде на востоки солнца земли моавли, и ополчися об ону страну арнона, и не вниде в пределы моавли, яко арнон бяше предел моавль: ¹⁹ и посла израиль послы к сиону царю аморрейску, царю есевонску, и рече к нему израиль: да прейдем по земли твоей до места нашего: ²⁰ и не восхоте сион израилю преити по пределом своим, и собра сион вся люди своя, и ополчися во иасе, и воева на израиля: ²¹ и предаде Господь Бог израилев сиона и вся люди его в руки израиля, и изби их: ²² и наследова израиль всю землю аморреа живущаго на земли той: и взя весь предел аморрейск от арнона даже до иавока, и от пустыни до иордана: ²³ и ныне Господь Бог израилев изгна аморреа от лица людий своих израиля, и ты ли хощеши наследити его? ²⁴ ни, но елико даде в наследие тебе хамос бог твой, сия да наследиши: а всех, ихже изгна Господь Бог наш от лица нашего, сия мы наследим: ²⁵ и ныне еда лучший еси ты валака сына сепфорова, царя моавля? не бранию ли боряшеся со израилем, или воюя воева его? ²⁶ егда вселися израиль во есевоне и в пределех его, и во ароире и в пределех его, и во всех градех, иже у иордана, триста лет, и почто не избавил еси их во время оно? ²⁷ аз же не согреших тебе, и ты твориши со мною зло, воюя на мя: да судит Господь судяй днесь между сыны израилевыми и между сыны аммони. ²⁸ И не послуша царь сынов аммоних словес иеффаевых, яже посылаше к нему. ²⁹ И бысть на иеффаи дух Господень, и прейде галаада и манассию, и прейде стражбу галаадову, и от стражбы галаадовы иде на ону страну сынов аммоних. ³⁰ И обеща иеффай обет Господеви и рече: аще преданием предаси сыны аммони в руку мою, ³¹ и будет исходяй, иже аще изыдет из врат дому моего во сретение мне, егда возвращуся с миром от сынов аммоних, и будет Господеви, и вознесу его во всесожжение. ³² И прииде иеффай к сыном аммоним воевати на ня: и предаде я Господь в руце его ³³ и изби их от ароира, дондеже приити в мениф, двадесять градов, и даже до авеля виноградов, язвою великою зело. И покорени быша сынове аммони пред лицем сынов израилевых. ³⁴ И прииде иеффай в массифу в дом свой: и се, дщерь его исхождаше во сретение его с тимпаны и лики: и сия бяше единородна ему возлюбленна: и не бе ему сына, ни другия дщере, кроме ея. ³⁵ И бысть егда увиде ю сам, растерза ризы своя и рече: о, дщи моя, смущающи смутила мя еси: и ты ныне в претыкание была еси пред очима моима: аз бо отверзох уста моя на тя ко Господу и не возмогу вспять возвратити. ³⁶ И рече к нему: отче, аще отверзл еси уста твоя ко Господу, сотвори мне, якоже изыде изо уст твоих, занеже сотвори тебе Господь месть врагом твоим от сынов аммоних. ³⁷ И рече ко отцу своему: сотвори, отче мой, сие слово: остави мя два месяца, да пойду и взыду на горы и плачуся девства моего аз и другини мои. ³⁸ И рече: иди. И отпусти ю на два месяца: и иде сама и другини ея, и плакася девства своего на горах. ³⁹ И бысть в конце двою месяцу, и возвратися ко отцу своему: и сотвори на ней обет свой, имже обещася: и сия не позна мужа. И бысть в повеление во израили: ⁴⁰ от дний до дний исхождаху дщери израилевы плакати о дщери иеффая галаадитина четыри дни в лете.