¹ И быша пределы племене сынов манассииных, яко сей первенец иосифу, махирови первенцу манассиину, отцу галаадову, (сей бо бысть муж храбр) в галаадитиде и васанитиде. ² И быша сыном манассииным прочым по сонмом их: сыном ахиезеровым и сыном елековым и сыном есриилевым, и сыном сехемовым и сыном семираеловым и сыном оферовым: сии суть сынове манассиины, сына иосифова, мужеск пол по племеном своим. ³ И салпааду сыну оферову, сына галаадова, сына махирова, сына манассиина, не быша сыны, но токмо дщери: и сия имена дщерем салпаадовым: маала и нуа, и егла и мелха и ферса. ⁴ И сташа пред елеазаром жерцем и пред иисусом сыном навиным и пред князи, глаголющя: Бог заповеда рукою моисеовою дати нам наследие посреде братии нашея. И дадеся им наследие повелением Господним, жребий в братии отца их. ⁵ И паде жребий манассию поле лавеково кроме земли галаадовы и васани, яже есть об ону страну иордана, ⁶ понеже дщери сынов манассииных наследиша жребий посреде братий своих: земля же галаадова бысть сыном манассииным прочым. ⁷ И быша пределы сынов манассииных от асир-махфофа, и данаф, яже есть пред лицем сихема, и идут пределы на иамин и на иасиф ко источнику фаффоф. ⁸ Манассию будет земля фаффоф: и фаффоф над пределы манассииными сыном ефремлим: ⁹ и снидут пределы к дебри кана на юг по дебри иарим: теревинф ефрему посреде града манассиина. И пределы манассиины к северу на водотечь, и будет исход его море: ¹⁰ от юга ефрему, и к северу манассии, и будет море предел им: и ко асиру совокупятся к северу, и иссахару от восток. ¹¹ И будет манассию (предел) между иссахаром и между асиром вефсан и веси их, и иевлаам и веси его, и живущыя в доре и веси его, и живущыя в ендоре и веси его, и живущыя в магедде и веси его, и живущыя в танахе и веси его, и третия часть нафефа и веси его. ¹² И не возмогоша сынове манассиины потребити градов сих: и нача хананей жити в земли сей. ¹³ И бысть егда укрепишася сынове израилевы, и сотвориша хананеов послушных, потреблением же не потребиша их. ¹⁴ Противореша же сынове иосифовы иисусу, глаголюще: почто наследствовал еси нас жребием единым и ужем единым? аз же люд мног есмь, и благослови мя Бог (даже доселе). ¹⁵ И рече им иисус: аще люд мног еси, взыди в дубраву и отреби себе тамо место в земли ферезеа и рафаима, аще утесняет тя гора ефремля. ¹⁶ И реша сынове иосифовы: не доволно нам горы ефремли: и конь преизбранный и железо всему хананею живущему в земли емек, в вефсане и в весех ея, и во юдоле иезраель. ¹⁷ И рече иисус к сыном иосифовым, ефрему и манассию, глаголя: аще люд мног еси и силу велику имаши, не будет ти жребий един: ¹⁸ зане дубрава будет тебе, понеже дубрава есть, и отребиши ю, и будет тебе, и концы ея, егда потребиши хананеа, аще конь преизбранный ему есть: (и сам силен,) ты бо пресилиши его.