¹ И быша пределы сынов иудиных по сонмом их, от предел идумейских, от пустыни син к ливу даже до кадис к югу: ² и быша пределы их от полудне до части моря сланаго, от верха клонящагося к югу, ³ и проходят прямо восхождению акраввим, и обходят сена, и восходят от юга до кадис-варни: и исходят из есрона, и восходят во аддару, и исходят на запады кадис, обходят аккарки, ⁴ и исходят во асемону, и преходят даже до дебри египетския: и будет исход пределов его к морю. Сии суть пределы их от юга. ⁵ И пределы от восток, все море сланое даже до части иордана, и пределы их к северу, и от верха моря, и от части иордански: ⁶ восходят пределы (тии) в вифаглу и преходят от севера к вефару, и восходят пределы к камени веора сына рувимля, ⁷ и восходят пределы к девиру дебри ахоровы, и нисходят до галгалы, яже есть прямо схождению адоммин, иже есть к югу дебри, и восходит предел к воде источника солнечна, и будет исход его источник рогиль: ⁸ и восходят пределы в дебрь енном, созади иевуса от полудне, сей есть Иерусалим: и исходят пределы на верх горы, яже есть пред лицем дебри енном к морю, яже есть от части земли рафаин к северу: ⁹ и преходит предел от верха горы ко источнику воды наффо и преходит к горе ефрони, и изведет предел в ваал, сей есть град иарим: ¹⁰ и обыдет предел от ваала к морю и прейдет в гору сиир, и прейдет созади града иарима от севера, сей есть хасалон: и снидет ко граду солнечну и прейдет к югу: ¹¹ и преходит предел созади аккарона до севера, и преходят пределы в сакхарон, и прейдут гору земли валаани, и преходят ко иавнилу, и будет исход пределов к морю, и пределы их от моря, море великое определит. ¹² Сии пределы сынов иудиных окрест по сонмом их. ¹³ И даде (иисус) халеву сыну иефонниину часть посреде сынов иудиных повелением Божиим, и даде ему иисус град арвок, отца енакова: сей есть хеврон. ¹⁴ И потреби оттуду халев сын иефонниин три сыны енаковы, сусиа и фолмаи и ахима: ¹⁵ и взыде оттуду халев на живущих в давире: имя же прежде бяше давиру град писмен. ¹⁶ И рече халев: иже аще возмет кто град писмен и возобладает им, дам ему асхань дщерь мою в жену. ¹⁷ И взя его гофониил сын кенеза, брата халевова, юнейший: и даде ему асхань дщерь свою в жену. ¹⁸ И бысть внегда отходити ей, и совеща с ним, глаголющи: попрошу у отца моего села. И воззва со осляти. И рече ей халев: что ти есть? ¹⁹ И рече ему: даждь ми благословение, яко в землю полуденную отдал еси мя: даждь ми голаф-маим. И даде ей халев голаф-маим вышний и голаф нижний. ²⁰ Сие наследие племене сынов иудиных по сонмом их: ²¹ быша же гради их гради племене сынов иудиных к пределом едомлим в пустыни, кавсеил и едраим и иагур, ²² и кина и димона и адада, ²³ и кедес и асор и ифнаксиф, ²⁴ и телем и валоф, ²⁵ и асор новый и град асером (сей есть асор): ²⁶ амам и самаа и модада, ²⁷ и асергадда и веффалеф, ²⁸ и асарсула и вирсавее (и села их и предградия их): ²⁹ и ваала и авим и асем, ³⁰ и елфолад и хесил и ерма, ³¹ и сикелег и ведевина и сансанна, ³² и лавоф и селеим, и аин и реммон: всех градов двадесять и девять, и села их. ³³ В напольней, есфаол и сараа, и асна (и рамен), ³⁴ и зано и ингоним, и фаффуа и инаим, ³⁵ и иеримуф и одоллам, (и немра) и сохо и азика, ³⁶ и сагарим и адиафаим, и гадира и села ея: гради четыренадесять и веси их. ³⁷ Сеннам и адаса и магдалгад, ³⁸ и далаан и масфа и иекфаил, ³⁹ и лахис и васхаф и еглом, ⁴⁰ и хаввон и ламас и хафлос, ⁴¹ и гадироф и виф-дагон, и нома и макида: гради шестьнадесять и веси их. ⁴² Левна и афер и асан, ⁴³ и иеффа и асенна и несив, ⁴⁴ и кеила и ахзев, и мариса (и едом): гради девять и веси их. ⁴⁵ Аккарон и села его и предградия его. ⁴⁶ (И) от аккарона, иемне и вси елики суть близ асдофа, и веси их: ⁴⁷ асдоф и веси его и предградия его: газа и веси ея и предградия ея, даже до водотечи египетския, и море великое определяет. ⁴⁸ И в горней, сафир и иефер и сохо, ⁴⁹ и ренна, град писмен (сей есть давир), ⁵⁰ и анов и есфемо и аним, ⁵¹ и госом и хилуон и гилон: градов единонадесять и веси их. ⁵² Ерев и есан и рума, ⁵³ и ианум и веф-фапфуе и афака, ⁵⁴ и хаммата и град арво (сей есть хеврон) и сиор: градов девять и села их. ⁵⁵ Маон и хермел, и зиф и иетта, ⁵⁶ и иездраель и иекдаам и зано, ⁵⁷ аким и гаваа и фамна: гради десять и веси их. ⁵⁸ Алул и вефсур и гедор, ⁵⁹ и мароф и вефанон и елфекен: гради шесть и веси их: феко и ефрафа (сей есть вифлеем): и фагор и етам, и кулон и татами, и сорис и карем, и галлим и вефир и манохо: градов единонадесять и веси их. ⁶⁰ Кариаф-ваал (сей град иарим) и аревва: гради два, и села их и предградия их. ⁶¹ Ваддаргис и вифарава, (и) мадон и сохоха, ⁶² и невсан и град соли и ингадди: гради шесть и веси их. ⁶³ И иевусей обиташе во Иерусалиме, и не возмогоша сынове иудины погубити их: и обиташа иевусее с сынми иудиными во Иерусалиме даже до дне онаго.