¹ И сии наследовавшии от сынов израилевых в земли ханаанстей, имже разделиша ю в наследие елеазар жрец и иисус сын навин и князи отечеств племен сынов израилевых: ² по жребием наследиша, якоже заповеда Господь моисеом дати девяти племеном и полплемени (манассиину), ³ даде бо моисей наследие дву племеном и полплемени манассиину об ону страну иордана: левитом же не даде жребия в них: ⁴ занеже быша сынове иосифовы два племена, манассиино и ефремле: и не дадеся части в земли левитом, но токмо грады обитати, и предградия скотом их, и скоты их. ⁵ Якоже заповеда Господь моисею, тако сотвориша сынове израилевы и разделиша землю. ⁶ И приидоша сынове иудины ко иисусу в галгалы. И рече к нему халев иефонниин кенезей: ты веси слово, еже глагола Господь к моисею человеку Божию о мне и о тебе в кадис-варни: ⁷ четыредесяти бо лет бех, егда посла мя моисей раб Господень от кадис-варни соглядати землю: и отвещах ему слово по сердцу его: ⁸ братия моя ходившии со мною превратиша сердце людий, аз же приложихся последовати Господеви Богу моему: ⁹ и клятся моисей в той день, глаголя: земля, на нюже возшел еси, тебе будет в жребий и чадом твоим во век, яко приложился еси последовати Господу Богу моему: ¹⁰ и ныне препита мя Господь, якоже рече, сие четыредесять и пятое лето, отнележе глагола Господь слово сие к моисею, и хождаше израиль в пустыни: и ныне се, ми днесь осмьдесят и пять лет: ¹¹ еще есмь днесь могий, якоже егда посла мя моисей: тако и ныне могу входити и исходити на брань: ¹² и ныне прошу у тебе горы сея, якоже рече Господь в день он, яко ты слышал еси слово сие в день оный: ныне же енакими тамо суть, грады тверды и велицы: аще убо будет Господь со мною, потреблю их, якоже рече ми Господь. ¹³ И благослови его иисус, и даде хеврон халеву сыну иефонниину, сыну кенезеину в жребий. ¹⁴ Сего ради бысть хеврон халеву иефонниину кенезеину в жребий даже до дне сего: понеже возследова повелению Господа Бога израилева. ¹⁵ Имя же хеврону прежде бяше град аргов: митрополь енакимлян сей. И почи земля от брани.