¹ И сии царие земли, ихже избиша сынове израилевы и наследиша землю их об ону страну иордана, от восток солнца, от дебри арнонския даже до горы аермон, и всю землю араву от восток: ² сиона царя аморрейска, иже живяше во есевоне, обладаяй от ароира, иже есть в дебри арнонстей от страны дебри, и пол (земли) галаада даже до иавока, (идеже) пределы сынов аммоних: ³ и арава даже до моря хенереф на востоки, и даже до моря арава, моря солищнаго от восток, путем иже ко вифсимофу, и от фемана иже под асидоф-фасгою: ⁴ и ог царь васанский остася от исполинов, иже обита во астарофе и во едраине, ⁵ обладаяй от горы аермон, и от селхи, и всею землею васан даже до предел гесури, и махафи, и пол галаада до предел сиона царя есевонска. ⁶ Моисей раб Господень и сынове израилевы поразиша я: и даде ю моисей раб Господень в наследие рувиму и гаду и полплемени манассиину. ⁷ И сии царие аморрейстии, яже изби иисус и сынове израилевы об ону страну иордана, при мори валгад на поли ливана, и даже до горы алок, восходящих в сиир: и даде ю иисус племеном израилевым в наследие по жребию их, ⁸ на горе и на поли, и во араве и во асидофе, и в пустыни и во нагеве, хеттеа и аморреа, и хананеа и ферезеа, и евеа и иевусеа: ⁹ царя иерихонска и царя гайска, иже есть близ вефиля, ¹⁰ царя Иерусалимска, царя хевронска, ¹¹ царя иеримуфска, царя лахисска, ¹² царя еглонска, царя газерска, ¹³ царя давирска, царя гадерска, ¹⁴ царя ермафска, царя адерска, ¹⁵ царя левнска, царя одолламска, ¹⁶ царя макидска, царя вефилска, ¹⁷ царя апфуска, царя оферска, ¹⁸ царя афекска, царя хесаромска, ¹⁹ царя самвронска, царя фувска, ²⁰ царя маронска, царя ахсафска, ²¹ царя фанахска, царя магдедонска, ²² царя кедесска, царя иеконама хермела, ²³ царя адорска нафеддоря, ²⁴ царя гоимска гелгеля, царя ферска. Вси сии царие тридесять един.