¹ Вонми, небо, и возглаголю, и да слышит земля глаголы уст моих, ² да чается яко дождь вещание мое, и да снидут яко роса глаголи мои, яко туча на троскот и яко иней на сено: ³ яко имя Господне призвах, дадите величие Богу нашему. ⁴ Бог, истинна дела его, и вси путие его суд: Бог верен, и несть неправды в нем: праведен и преподобен Господь. ⁵ Согрешиша, не того чада порочная: роде строптивый и развращенный, ⁶ сия ли Господеви воздаете, сии людие буии и не мудри? не сам ли сей Отец твой стяжа тя, и сотвори тя, и созда тя? ⁷ Помяните дни вечныя, разумейте лета рода родов: вопроси отца твоего, и возвестит тебе, старцы твоя, и рекут тебе. ⁸ Егда разделяюще вышний языки, яко разсея сыны адамовы, постави пределы языков по числу ангел Божиих, ⁹ и бысть часть Господня, людие его иаков, уже наследия его израиль: ¹⁰ удовли его в пустыни, в жажди зноя в безводне: обыде его и наказа его, и сохрани его яко зеницу ока: ¹¹ яко орел покры гнездо свое, и на птенцы своя возжеле: простер криле свои и прият их, и подят их на раму своею. ¹² Господь един вождаше их, и не бе с ними бог чуждь: ¹³ возведе я на силу земли, насыти их жит селных: ссаша мед из камене и елей от тверда камене, ¹⁴ масло кравие и млеко овчее с туком агнчим и овним сынов юнчих и козлих, с туком пшеничным, и кровь гроздову пияху вино. ¹⁵ И яде иаков и насытися, и отвержеся возлюбленный: уты, утолсте, разшире: и остави Бога сотворшаго его, и отступи от Бога спаса своего. ¹⁶ Прогневаша мя о чуждих, и в мерзостех своих преогорчиша мя. ¹⁷ Пожроша бесовом, а не Богу, богом, ихже не ведеша: нови и секрати приидоша, ихже не ведеша отцы их. ¹⁸ Бога рождшаго тя оставил еси и забыл еси Бога питающаго тя. ¹⁹ И виде Господь, и возревнова, и раздражися за гнев сынов их и дщерей, ²⁰ и рече: отвращу лице мое от них и покажу, что будет им напоследок, яко род развращен есть, сынове, имже несть веры в них: ²¹ тии раздражиша мя не от Бозе, прогневаша мя во идолех своих: и аз раздражу их не о языце, от языце же неразумливе прогневаю их: ²² яко огнь возгорится от ярости моея, разжжется до ада преисподняго, снест землю и жита ея, попалит основания гор: ²³ соберу на них злая, и стрелы моя скончаю в них: ²⁴ тающе гладом и снедию птиц, и горб неисцелен: зубы зверий послю в на, с яростию пресмыкающихся по земли: ²⁵ отвне обезчадит их мечь, и от храмов их страх: юноша с девою, ссущее с совершенным старцем. ²⁶ Рех: разсею их, уставлю же от человек память их: ²⁷ токмо за гнев врагов, да не долголетствуют, и да не налягут супостати, да не рекут: рука наша высока, и не Господь сотвори сия вся: ²⁸ яко язык погубивый совет есть, и несть в них художества, не смыслиша разумети: ²⁹ сия вся да приимут во грядущее лето. ³⁰ Како поженет един тысящы, и два двигнета тмы, аще не Бог отдаде их, и Господь предаде их? ³¹ Не суть бо бози их, яко Бог наш: врази же наши неразумливи. ³² От виноградов бо содомских виноград их, и розга их от гоморры: грозд их грозд желчи, грозд горести их: ³³ ярость змиев вино их, и ярость аспидов неисцельна. ³⁴ Не сия ли вся собрашася у мене и запечатлешася в сокровищах моих? ³⁵ В день отмщения воздам, во время егда соблазнится нога их: яко близ день погибели их, и предстоят готовая вам: ³⁶ яко судити имать Господь людем своим, и о рабех своих умолен будет: виде бо их разслабленны и истаявшя во время и изнемогшя. ³⁷ И рече Господь: где суть бози их, на нихже уповаша, ³⁸ ихже тук жертв их ядясте, и пиясте вино треб их? да воскреснут и помогут вам, и будут вам покровители. ³⁹ Видите, видите, яко аз есмь, и несть Бог разве мене: аз убию и жити сотворю: поражу и аз исцелю, и несть иже измет от руку моею: ⁴⁰ яко воздвигну на небо руку мою, и кленуся десницею моею, и реку: живу аз во веки: ⁴¹ яко поострю якоже молнию мечь мой, и приимет суд рука моя, и воздам месть врагом и ненавидящым мя воздам: ⁴² упою стрелы моя от крове, и мечь мой снест мяса от крове язвеных и пленения, от глав князей языческих. ⁴³ Возвеселитеся, небеса, купно с ним, и да поклонятся ему вси ангели Божии: возвеселитеся, языцы, с людьми его, и да укрепятся ему вси сынове Божии: яко кровь сынов своих отмщает и отмстит, и воздаст месть врагом и ненавидящым его воздаст: и очестит Господь землю людий своих. ⁴⁴ И написа моисей песнь сию в той день, и научи ей сыны израилевы: и вниде моисей к людем и глагола вся словеса закона сего во ушы людем, сам и иисус навин. ⁴⁵ И сконча моисей глаголя словеса сия вся всему израилю, ⁴⁶ и рече к ним: внемлите сердцем вашим вся словеса сия, яже аз засвидетелствую вам днесь, яже да заповесте сыном вашым, хранити и творити вся словеса закона сего, ⁴⁷ яко не тщетно слово сие вам, зане сия жизнь ваша, и ради слова сего долги дни будете на земли, на нюже вы преходите иордан тамо наследити ю. ⁴⁸ И рече Господь к моисею в день сей, глаголя: ⁴⁹ взыди на гору аварим, сия гора навав, яже есть в земли моавли прямо иерихону, и виждь землю ханааню, юже аз даю сыном иилевым во обдержание: ⁵⁰ и скончайся тамо на горе, на нюже восходиши, и приложися к людем твоим, якоже умре аарон брат твой на горе ор и приложися к людем своим: ⁵¹ понеже не покористеся словеси моему в сынех израилевых у воды пререкания кадис в пустыни син, понеже не освятисте мене в сынех израилевых: ⁵² яко прямо узриши землю, и тамо не внидеши, юже даю сыном израилевым.