¹ И рече Господь к моисею и аарону, глаголя: ² человек держайся по чину своему, по знамениям, по домом отечеств своих, да ополчаются сынове израилевы пред Господем, окрест скинии свидения да ополчаются сынове израилевы. ³ И ополчающиися первии на восток чин полка иудина с силою их, и князь от сынов иудиных наассон сын аминадавль: ⁴ сила его согляданая седмьдесят и четыри тысящы и шесть сот. ⁵ И ополчающиися близ от племене иссахарова, и князь сынов иссахаровых нафанаил сын согаров: ⁶ сила его согляданая пятьдесят и четыри тысящы и четыре ста. ⁷ И ополчающиися близ от племене завулоня, и князь сынов завулоних елиав сын хелонь: ⁸ сила его согляданая пятьдесят седмь тысящ и четыре ста. ⁹ Всех сочтеных от полка иудина сто осмьдесят шесть тысящ и четыре ста, с силою их первии да воздвизаются. ¹⁰ Чины полка рувимля к югу с силою его, и князь сынов рувимлих елисур сын седиуров: ¹¹ сила его согляданая четыредесять и шесть тысящ и пять сот. ¹² И ополчающиися близ его от племене симеоня, и князь сынов симеоних саламииль сын сурисадаин: ¹³ сила его сочтеная пятьдесят и девять тысящ и три ста. ¹⁴ И ополчающиися близ его от племене гадова, и князь сынов гадовых елисаф сын рагуиль: ¹⁵ сила его согляданая четыредесять и пять тысящ и шесть сот и пятьдесят. ¹⁶ Всех же сочтеных полка рувимля сто пятьдесят едина тысяща и четыре ста и пятьдесят, с силою их втории да воздвизаются. ¹⁷ И да воздвигнется скиния свидения и полк левитский посреде полков: якоже ополчатся, тако и да воздвигнутся, кийждо держася по чину своему. ¹⁸ Чин полка ефремля к морю с силою их, и князь сынов ефремлих елисама сын емиудов: ¹⁹ сила его сочтеная четыредесять тысящ и пять сот. ²⁰ И ополчающиися близ племя манассиино, и князь сынов манассииных гамалиил сын фадассуров: ²¹ сила его согляданая тридесять две тысящы и двести. ²² И ополчающиися близ от племене вениаминя, и князь сынов вениаминих авидан сын гадеониев: ²³ сила его сочтеная тридесять пять тысящ и четыре ста. ²⁴ Всех сочтеных полка ефремля сто осмь тысящ и сто, с силою их гретии да воздвизаются. ²⁵ Чин полка данова к северу с силою их, и князь сынов дановых ахиезер сын амисадаин: ²⁶ сила его согляданая шестьдесят две тысящы и седмь сот. ²⁷ И ополчающиися близ его племя асирово, и князь сынов асировых фагаиил сын ехранов: ²⁸ сила его согляданая четыредесять едина тысяща и пять сот. ²⁹ И ополчающиися близ племя неффалимле, и князь сынов неффалимлих ахирей сын енань: ³⁰ сила его согляданая пятьдесят три тысящы и четыре ста. ³¹ Всех сочтеных полка данова сто пятьдесят седмь тысящ и шесть сот, с силою их последнии да воздвизаются по чину своему. ³² Сие сочтение сынов израилевых по домом отечеств их: вся соглядания полков с силами их шесть сот три тысящы и пять сот пятьдесят. ³³ Левити же не соглядашася среди сынов израилевых, якоже заповеда Господь моисею. ³⁴ И сотвориша сынове израилевы вся, елика заповеда Господь моисею: тако ополчахуся по чином своим, и тако воздвизахуся кийждо близ по сонмом своим, по домом отечеств своих.