¹ И вземше два сына аароня, надав и авиуд, кийждо свою кадилницу, вложиста в ня огнь и возложиста нань фимиам, и принесоста пред Господа огнь чуждь, егоже не повеле има Господь. ² И изыде огнь от Господа, и пояде я, и умроста пред Господем. ³ И рече моисей ко аарону: сие есть, еже рече Господь, глаголя: в приближающихся мне освящуся и во всем сонме прославлюся. И умилися аарон. ⁴ И призва моисей мисаила и елисафана, сыны озиилевы, сыны брата отца аароня, и рече им: приступите и возмите братий своих от лица святых вне полка. ⁵ И приступиша, и взяша их в ризах их, (и изнесоша) вне полка, якоже рече моисей. ⁶ И рече моисей ко аарону и елеазару и ифамару, сыном его оставшымся: глав ваших не открывайте и риз ваших не раздирайте, да не умрете, и на весь сонм будет гнев: кратия же вашя весь дом израилев да плачутся запаления, имже запалишася от Господа: ⁷ и из дверий скинии свидения не исходите, да не умрете: елей бо помазания, иже от Господа, на вас есть. И сотвориша по словеси моисеову. ⁸ И рече Господь ко аарону, глаголя: ⁹ вина и сикера не пийте, ты и сынове твои с тобою, егда входите в скинию свидения, или приступающым вам ко олтарю, да не умрете: (и будет сие) законно вечно в роды вашя: ¹⁰ Отлучити между вещми святыми и между сквернавыми, и между нечистыми и между чистыми, ¹¹ и устроити сыном израилевым вся законная, яже глагола Господь к ним рукою моисеовою. ¹² И рече моисей ко аарону, и елеазару и фамару, сыном, его оставшымся: возмите жертву оставшуюся от приносов Господних и ядите опресноки у олтаря: яко святая святых суть: ¹³ и ядите я на месте святе: законно бо тебе есть, и законно сыном твоим, сие от приносов Господних: сице бо ми заповеда Господь: ¹⁴ и груди участия и рамо участия ядите на месте святе ты и сынове твои, и дом твой с тобою: законно бо тебе, и законно сыном твоим дадеся от жертв спасении сынов израилевых: ¹⁵ рамо участия и груди участия в приносех тучных да принесут, участие еже приносити пред Господа: и да будет тебе и сыном твоим и дщерем твоим с тобою законно вечно, якоже повеле Господь моисею. ¹⁶ И козла, иже греха ради, взыскуя взыска моисей: и сей сожжен бяше. И разгневася моисей на елеазара и ифамара, сыны аарони оставльшыяся, глаголя: ¹⁷ почто не снедосте на месте святе, еже греха ради, яко святая святых суть, сие даде вам ясти, да отимете грех сонма и помолитеся о них пред Господем: ¹⁸ не внесеся бо от крове его в святое: пред лицем внутрь да ясте е на месте святе, якоже повеле мне Господь. ¹⁹ И рече аарон к моисею, глаголя: аще днесь принесоша яже греха ради своего и всесожжения своего пред Господа, и случишася мне сицевая, и снем, яже греха ради, днесь, еда угодно будет Господу? ²⁰ И слыша моисей, и угодно ему бысть.