¹ И сотвори веселеил кивот ² и позлати его златом чистым внутрьуду и внеуду, ³ и сотвори ему злат обвод обоюду: и слия ему четыри колца злата на четыри страны его: два на стране единей, и два на стране друзей, ⁴ широки носилам, яко носити его ими. ⁵ И сотвори очистилище над кивотом от злата чиста, ⁶ и два херувима златы: ⁷ херувима единаго на стране очистилища, и херувима втораго на стране вторей очистилища, ⁸ осеняющыя крилами своими над очистилищем. ⁹ И сотвори трапезу предложения от злата чиста, ¹⁰ и слия ей четыри колца злата: два колца на стране единей, и два колца на стране вторей, широки яко носити носилами в них. ¹¹ И носила кивоту и трапезе сотвори, и позлати их златом. ¹² И сотвори сосуды трапезе, блюда и фимиамники, и чашы златы и возливалники, имиже возливати будет, от злата. ¹³ И сотвори светилник, еже светити, златый, крепок стеблом, ¹⁴ и ветви от обоих стран его: ¹⁵ и от ветвий его отрасли исходящыя, три от единыя и три от вторыя страны, равны друг другу: ¹⁶ и светила их, яже на верху их, во образ ореха, от них: и цветцы от них, и крузи их, "да будут светила на них: и цветец седмый, иже на краю светила, на верху свыше, крепкий весь злат: ¹⁷ и седмь светил на нем златых, и щипцы его златыя, и подставы их златы. ¹⁸ Сей посребри столпы и слия столпом колца злата, и позлати вереи златом, и позлати столпы завесе златом, и сотвори петли златы: ¹⁹ сей сотвори и крючки скинии златы, и крючки двора, и крючки на распрострение завесы сверху медяны: ²⁰ сей слия главицы сребряны скинии, и главицы медяны дверий скинии, и двери двора, и петли сотвори сребряны на столпах: сей посребри их: ²¹ сей сотвори колки скинии и колки двора медяны. ²² сей сотвори олтарь медян из кадилниц медяных, яже быша мужем вскрамолившымся с кореовым сонмищем: ²³ сей сотвори вся сосуды олтаря и кадилник его, и стояло его и чашы, и вилицы его медяны: ²⁴ сей сотвори олтарю окрест обложение делом мрежным, снизу огнища под ним даже до среды его, и положи на нем четыри колца от четырех стран обложения олтаря медяны, широки носилам, еже носити олтарь на них: ²⁵ сей сотвори елей помазания святый, и сложение фимиама, дело чистое мироварца: ²⁶ сей сотвори умывалницу медяну и стояло ея медяно из зерцал постниц, яже постишася у дверий скинии свидения, в оньже день постави ю: ²⁷ и сотвори умывалницу, да омывают из нея моисей и аарон и сынове его руце свои и нозе, входящым им в скинию свидения: или егда приходят ко олтарю служити, омывахуся из нея, якоже заповеда Господь моисею.