¹ И сия суть, яже сотвориши им: освятиши я, яко священнодействовати им мне: да возмеши же телца единаго от говяд и овна два непорочна: ² и хлебы пресны смешены с елеем, и опресноки помазаны елеем: из муки пшеничны сотвориши я: ³ и да вложиши я в кош един, и принесеши я в коши, и телца и два овна. ⁴ И аарона и сыны его приведеши пред двери скинии свидения, и измыеши я водою: ⁵ и взем ризы святыя, облечеши аарона брата твоего, и в хитон подир, и в ризу верхнюю, и в слово: и совокупиши ему слово к нарамнику: ⁶ и возложиши на главу его клобук: и возложиши дщицу освящение на увясло: ⁷ и да возмеши от елеа помазания, и да возлиеши и на главу его и помажеши его. ⁸ И сыны его приведеши и облечеши я в ризы: ⁹ и опояшеши я поясы, и возложиши на них клобуки, и будет ими священство мне во веки: и совершиши руце аарони и руце сынов его. ¹⁰ И да приведеши телца пред двери скинии свидения, и возложат аарон и сынове его руце свои на главу телца пред Господем у дверий скинии свидения. ¹¹ И да заколеши телца пред Господем у дверий скинии свидения: ¹² и да возмеши от крове телчи и помажеши на рогах олтаревых перстом твоим: останок же весь крове пролиеши у стояла олтарнаго: ¹³ и да возмеши весь тук, иже на утробе, и препонку печени, и обе почки, и тук иже на них, и возложиши на олтарь: ¹⁴ мяса же телча, и кожу, и мотыла да сожжеши на огни вне полка: за грех бо есть. ¹⁵ И овна да поймеши единаго, и да возложат аарон и сынове его руки своя на главу овню: ¹⁶ и заколеши его, и взем кровь пролиеши у олтаря окрест: ¹⁷ и овна да разсечеши на уды и измыеши внутренняя и ноги в воде, и возложиши на разсеченныя части со главою: ¹⁸ и вознесеши всего овна на олтарь, всесожжение Господу в воню благоухания: жертва Господу есть. ¹⁹ И да поймеши овна втораго, и возложит аарон и сынове его руки своя на главу овню: ²⁰ и заколеши его, и возмеши от крове его, и возложиши на край ушесе аароня деснаго и на край руки десныя и на край ноги десныя, и на край ушес сынов его десных и на край рук их десных и на край ног их десных: ²¹ и да возмеши от крове, яже на олтари, и от елеа помазания, и да воскропиши на аарона и на ризу его, и на сыны его и на ризы сынов его с ним: и освятится сам и ризы его, и сыны его и ризы сынов его с ним: кровь же овню да пролиеши у олтаря окрест. ²² И да возмеши от овна тук его, и тук покрывающий утробу его, и препонку печени, и обе почки, и тук иже на них, и рамо десное: есть бо совершение сие: ²³ и хлеб един с елеем, и опреснок един от коша опресноков, предложенных пред Господем: ²⁴ и возложиши вся на руки аарони и на руки сынов его, и отделиши я отделение пред Господем: ²⁵ и да возмеши я от рук их, и вознесеши на олтарь всесожжения в воню благоухания пред Господем: приношение есть Господу. ²⁶ и да возмеши грудь от овна совершения, яже есть аарону, и отделиши ю отделение пред Господем, и будет тебе в часть: ²⁷ и освятиши грудь отделение, и рамо отлучения, еже отделися, и яже отяся от овна совершения от аарона и от сынов его, ²⁸ и будет аарону и сыном его законно вечно от сынов израилевых: есть бо отделение сие, и отятие будет от сынов израилевых от жертв спасителных сынов израилевых, отделение Господу. ²⁹ И ризы святы, яже суть аарону, да будут сыном его по нем, помазатися им в них и совершити руки своя. ³⁰ Седмь дний да облачится в ня иерей великий, иже вместо его от сынов его, иже внидет в скинию свидения служити во святилищи. ³¹ И овна совершения да возмеши и испечеши мяса на месте святе, ³² и да ядят аарон и сынове его мяса овня, и хлебы, яже в коши у дверий скинии свидения: ³³ да ядят сия, имиже освятишася в них, совершити руки своя, освятити я: и иноплеменник да не снест от них, суть бо свята. ³⁴ Аще же останется от мяс жертвы совершения и от хлебов до утрия, да сожжеши останки огнем: да не снедятся, освящение бо есть. ³⁵ И сотвориши аарону и сыном его тако по всем, елика заповедах тебе: седмь дний совершиши руце их. ³⁶ И телца греха ради да сотвориши в день очищения: и да очистиши олтарь, егда освящаеши на нем: и помажеши его, яко освятити его. ³⁷ Седмь дний очистиши олтарь и освятиши его, и будет олтарь святая святых: всяк прикасаяйся олтарю освятится. ³⁸ И сия суть, яже сотвориши на олтари: агнца единолетна непорочна два на всяк день на олтари присно жертву непрестанную: ³⁹ агнца единаго да сотвориши рано, и втораго агнца да сотвориши в вечер: ⁴⁰ и десятую часть муки пшеничны с елеем смешены, в четвертую часть ина, и возлияние четвертую часть меры ина вина единому овну. ⁴¹ И агнца втораго да сотвориши в вечер, якоже утреннюю жертву, и возлияние его: сотвориши в воню благоухания приношение Господу. ⁴² Жертву всегдашнюю в слухи и в роды вашя пред дверми скинии свидения пред Господем, в нихже познан буду тебе тамо, якоже глаголати к тебе. ⁴³ И завещаю тамо сыном израилевым, и освящуся во славе моей, ⁴⁴ и освящу скинию свидения и олтарь, и аарона и сыны его освящу, священнодействовати мне, ⁴⁵ и нарекуся в сынех израилевых, и буду им Бог: ⁴⁶ и уведят, яко аз есмь Господь Бог их, изведый их из земли египетския, нарещися им и быти им Бог.