¹ И ты приведи к себе аарона, брата твоего, и сыны его от сынов израилевых, да священнодействуют мне аарон и надав, и авиуд и елеазар и ифамар, сынове аарони. ² И да сотвориши ризу святу аарону брату твоему в честь и славу. ³ И ты возглаголи ко всем премудрым умом, ихже наполних духа мудрости и смышления: и да сотворят ризу святу аарону, в нейже имать священнодействовати мне во святилищи. ⁴ И сия суть ризы, ихже сотворят: наперсник и ризу верхнюю, и долгую ризу и ризу тресновиту, и наглавие и пояс: и да сотворят ризы святы аарону и сыном его, во еже священнодействовати мне. ⁵ И сии да возмут злато и синету, и багряницу и червленицу и виссон, ⁶ и да сотворят ризу верхнюю от виссона сканаго, дело тканно пестрящаго. ⁷ Две ризы верхния да будут ему придержащяся едина друзей, на обе стране связаныя. ⁸ И ткание риз верхних, еже есть на них, по сотворению их да будет от злата чиста и синеты, и багряницы и червленицы пряденыя и виссона сканаго. ⁹ И возмеши два каменя, камене смарагда, и изваяеши на них имена сынов израилевых: ¹⁰ шесть имен на камени единем и шесть имен прочиих на камени друзем по родом их, ¹¹ дело каменныя хитрости: ваянием печати изваяеши оба каменя имены сынов израилевых. ¹² И положиши оба каменя на раменах верхния ризы: камени в память суть сыном израилевым: и воздвигнет аарон имена сынов израилевых пред Господем на оба рамена своя в память о них. ¹³ И да сотвориши щитцы от злата чиста, ¹⁴ и да сотвориши две тресновицы от злата чиста, смешены цветами, дело плетения: и возложиши тресновицы сплетеныя на щитцы по нарамником их сопреди. ¹⁵ И да сотвориши слово судное, дело пестрящаго: по составу ризы верхния да сотвориши сие от злата и синеты, и багряницы и червленицы пряденыя и виссона сканаго: ¹⁶ сотвориши е четвероуголно: да будет сугубо, пяди долгота его и пяди широта, ¹⁷ и нашиеши на нем швение каменное в четыри ряда. Ряд камений да будет: сардий, топазий и смарагд, ряд един: ¹⁸ и ряд вторый, анфракс и сапфир и иаспис: ¹⁹ и ряд третий, лигирий и ахат и амефист: ²⁰ и ряд четвертый, хрисолиф и вириллий и онихий: объяты златом, исплетены в злате да будут по ряду своему. ²¹ И камение да будут от имен двунадесяти сынов израилевых пред Господем: на дву раменах его дванадесять по именам их и по родом их, изваяни печатми, коегождо по имени да будут в дванадесять племен. ²² И да сотвориши на слове тресны сплетены, делом верижным, от злата чиста. ²³ И да сотвориши на словеси два колца злата: и возложиши два колца злата на оба края словесе. ²⁴ И возложиши тресны и чепи златы на два колца от обоих краев словесе. ²⁵ И два края двух тресн наложиши на две чепочки, и возложиши на рамена верхних риз лицем ко другъдругу. ²⁶ И сотвориши два колца злата, и возложиши на обе страны словесе на край от края задняго верхних риз, отвнутрь. ²⁷ И сотвориши два колца злата, и возложиши на оба рамена верхния ризы снизу его, лицем по согбению свыше соткания верхних риз. ²⁸ И стягнеши слово колцами, яже на нем, с колцами верхних риз сложеными, из синеты плетеными во ткание верхних риз, да не низпускается слово с верхних риз. ²⁹ И да возмет аарон имена сынов израилевых на слове суднем на персех, входящь во святое на память пред Богом. И да положиши на словеси суднем тресны: плетения на оба края словесе возложиши, и оба щита возложиши на обе раме нарамника на лице. ³⁰ И да возложиши на слово судное явление и истину: и да будет на персех аарону, егда внидет в святое пред Господа: и да носит аарон суды сынов израилевых на персех пред Господем всегда. ³¹ И да сотвориши ризу внутреннюю подир всю синю. ³² И да будет устие посреде его, ожерелие имущо кругом устия делом тканым, сгиб сошвен от него, да не раздерется. ³³ И да сотвориши на омете ризнем снизу, аки шипка цветущаго, пугвицы из синеты и багряницы, и червленицы пряденыя и виссона сканаго, на омете ризы кругом: в тойже образ пугвицы златы, и звонцы между сими окрест. ³⁴ При пугвице злат звонец, и цвет на омете ризнем, кругом. ³⁵ И да будет аарону, егда служит, слышан глас его, входящу во святое пред Господа, и исходящу, да не умрет. ³⁶ И да сотвориши дщицу злату чисту: и изобразиши на ней образ печати, святыня Господня, ³⁷ и да возложиши ю на синету сканую, и да будет на увясле, спреди увясла да будет, ³⁸ и да будет на челе аарони: и отимет аарон согрешения святых, елика освятят сынове израилевы от всякаго даяния святых своих, и да будет на челе аарони всегда приято ими пред Господем. ³⁹ И тресны риз от виссона: и сотвориши клобук виссонный, и пояс да сотвориши дело пестрящаго. ⁴⁰ И сыном аароновым да сотвориши ризы и поясы, и клобуки да сотвориши им в честь и славу: ⁴¹ и облечеши в ня аарона брата твоего и сыны его с ним, и да помажеши их, и исполниши руце их и освятиши их, да ми священнодействуют. ⁴² И да сотвориши им надраги льняны покрывати стыдения плоти их, от бедр даже до стегн будут, ⁴³ и да имать аарон и сынове его, егда входят в скинию свидения, или егда приходят служити к жертвеннику святыни: и да не наведут на ся греха, да не умрут: законное вечное (да будет) ему и семени его по нем.