¹ Скинию же да сотвориши от десяти опон от виссона сканаго и синеты, и багряницы и червленицы сканыя: херувимы делом тканым да сотвориши я. ² Долгота опоны единыя двадесять и осмь лактий, и широта четырех лактий, опона едина да будет: мера таяжде да будет всем опонам. ³ Пять же опон да будут взаим придержащяся едина от другия, и пять опон да будут содержащяся друга о друзей. ⁴ И да сотвориши им петли из синеты у края опоны единыя, от единыя страны в сложение: и сице сотвориши на краю опоны внешния к сложению второму. ⁵ Пятьдесят же петлей сотвориши единей опоне, и пятьдесят петлей да сотвориши от края опоны по сложению вторыя, лицем к лицу сходящыяся между собою каяждо. ⁶ И сотвориши пятьдесят крючков златых и совокупиши опоны едину ко друзей крючками: и будет скиния едина. ⁷ И да сотвориши опоны власяныя в покров над скиниею, единонадесять опон сотвориши их. ⁸ Долгота опоны единыя да будет тридесяти лактий, и четырех лактий широта опоны единыя: таяжде мера да будет единонадесяти опонам. ⁹ И совокупиши пять опон вкупе, и шесть опон вкупе: и усугубиши опону шестую ко входу скинии. ¹⁰ И да сотвориши петлей пятьдесят на краи опоны единыя, яже среде по сложению, и пятьдесят петлей да сотвориши на краи опоны совокупляющияся вторыя. ¹¹ И сотвориши крючков медяных пятьдесят: и совокупиши крючки с петлями, и да совокупиши опоны, и будет едино. ¹² И да подложиши излишнее от опон скинии: полуюпоною оставшеюся да покрыеши излишнее опон скинии: да прикрыеши созади скинии. ¹³ Лакоть (един) от сего, и лакоть (един) от другаго, от излишняго опон, в долготу опон скинии: да будет покрывающее на стране скинии, сюду и сюду да покрывает. ¹⁴ И да сотвориши покров скинии от кож овних червленых, и прикрывала от кож синих сверху. ¹⁵ И да сотвориши столпы скинии от древ негниющих: ¹⁶ десяти лактий (в высоту) да сотвориши столп един, лактя же единаго и пол широта столпа единаго: ¹⁷ два закройца (на краях) столпу единому, противу стояща другъдругу: тако сотвориши всем столпом скинии. ¹⁸ И да сотвориши столпы скинии, двадесять столпов от страны яже к северу: ¹⁹ и четыредесять стоялов сребряных да сотвориши двадесятим столпом: два стояла единому столпу на обоих краех его и два стояла другому столпу на обоих краех его: ²⁰ и в стране вторей южней двадесять столпов: ²¹ и четыредесять стоялов им сребряных: два стояла столпу единому на обоих краех его и два стояла столпу другому на обоих краех его. ²² И созади скинии по стране яже к морю да сотвориши шесть столпов, ²³ и два столпа сотвориши во углах скинии созади. ²⁴ И будут равни от долу: по томужде да будут равни от глав в состав един: тако да сотвориши обоим двум углам: равни да будут. ²⁵ И да будут осмь столпы и стояла их сребряна шестьнадесять: два стояла единому столпу и два стояла другому столпу, на обоих краех его. ²⁶ И да сотвориши вереи от древ негниющих: пять верей столпу единому от единыя страны скинии, ²⁷ и пять верей столпу единому вторей стране скинии, и пять верей столпу заднему стране скинии, яже к морю: ²⁸ и верея средняя посреде столпов да проходит от единыя страны в другую страну. ²⁹ И столпы да позлатиши златом: и колца сотвориши злата, в няже вложиши вереи: и позлатиши вереи златом. ³⁰ И возставиши скинию по образу показанному тебе на горе. ³¹ И да сотвориши завесу от синеты и багряницы, и червленицы сканыя и виссона пряденаго: делом тканым да сотвориши ю херувимы. ³² И возложиши ю на четыри столпы негниющыя позлащены златом: и верхи их златы, и стояла их четыри сребряна. ³³ И повесиши завесу на столпех, и внесеши тамо внутрь завесы кивот свидения: и разделяти будет завеса вам посреде святилища и посреде святая святых, ³⁴ и закрыеши завесою кивот свидения во святая святых. ³⁵ И поставиши трапезу вне завесы, и светилник прямо трапезы на стране скинии, яже к югу: и трапезу поставиши на стране скинии, яже к северу. ³⁶ И да сотвориши закров в дверех скинии от синеты и багряницы, и червленицы сканыя и виссона сканаго, делом пестрящаго. ³⁷ И да сотвориши завесе пять столпов от древ негниющих, и позлатиши их златом, и верхи их златы: и да слиеши им пять стоял медяных.