¹ Воздвигошася же от елима, и прииде весь сонм сынов израилевых в пустыню син, яже есть между елимом и между синою. В пятый же надесять день втораго месяца изшедшым им от земли египетския, ² возропта весь сонм сынов израилевых на моисеа и аарона, ³ и рекоша к ним сынове израилевы: о дабы быхом измерли мы уязвени от Господа в земли египетстей, егда седяхом над котлы мясными и ядохом хлебы до сытости: яко изведосте ны в пустыню сию уморити весь сонм сей гладом. ⁴ Рече же Господь к моисею: се, аз одождю вам хлебы с небесе: и изыдут людие, и соберут доволное дню, на (всяк) день, яко да искушу их, аще пойдут в законе моем, или ни. ⁵ и будет в день шестый, и уготовят, еже внесут, и да будет сугубо, еже собираша на всяк день. ⁶ Рече же моисей и аарон ко всему сонму сынов израилевых: в вечер (сей) увесте, яко Господь изведе вы от земли египетския, ⁷ и заутра узрите славу Господню, внегда услышати Господу роптание ваше на Бога: мы же что есмы, яко ропщете на ны? ⁸ И рече моисей: егда даст Господь вам в вечер мяса ясти и хлебы заутра до сытости, понеже услыша Господь роптание ваше, имже ропщете на ны: мы же что есмы? не на нас бо роптание ваше, но точию на Бога. ⁹ И рече моисей ко аарону: глаголи ко всему сонму сынов израилевых: приидите пред Бога, услыша бо роптание ваше. ¹⁰ Егда же глаголаше аарон всему сонму сынов израилевых, и обратишася в пустыню, и слава Господня явися во облаце, ¹¹ и рече Господь к моисею глаголя: ¹² слышах роптание сынов израилевых: рцы к ним глаголя: к вечеру да снесте мяса и заутра насытитеся хлебов, и увесте, яко аз есмь Господь Бог ваш. ¹³ Бысть же вечер, и приидоша крастели и покрыша полк. Заутра же бысть спадшей росе около полка, ¹⁴ и се, на лицы пустыни мелко яко кориандр, бело аки лед на земли. ¹⁵ Узревше же то сынове израилевы, реша друг ко другу: что есть сие? Не ведяху бо, что бяше. Рече же моисей к ним: сей хлеб, егоже даде Господь вам ясти: ¹⁶ сей глаголгол, егоже завеща Господь: соберите от него кийждо на домашния, гомор поглавно по числу душ ваших, кийждо вас с домашними своими соберите. ¹⁷ И сотвориша тако сынове израилевы, и собраша ов много, ов же мало: ¹⁸ и измеривше гомором, не преизбыточествова иже много, и иже мало, не мнее прият: кийждо на домашних своих собраша. ¹⁹ И рече моисей к ним: никтоже да оставит на утрие от него. ²⁰ И не послушаша моисеа, но оставиша нецыи от него на утрие, и воскипе червми и возсмердеся. И оскорбися на них моисей. ²¹ И собираша оное рано рано, кийждо надлежащее себе: егда же огреваше солнце, растаяваше. ²² Бысть же в день шестый, собраша потребное сугубо, два гомора комуждо. Приидоша же вси князи сонма и поведаша моисею. ²³ Рече же моисей к ним: сие слово есть, еже глагола Господь: суббота покой свят Господу заутра: елика аще печете, пецыте, и елика аще варите, варите, все же избыточное оставите в скрове на утрие. ²⁴ И оставиша от того до утрия, якоже заповеда им моисей: и не возсмердеся, ниже червь бысть в нем. ²⁵ Рече же моисей: ядите днесь, есть бо суббота покой Господу: днесь не обрящете на поли: ²⁶ шесть дний собирайте, в седмый же день суббота: яко не будет в нем. ²⁷ Бысть же в седмый день, изыдоша нецыи от людий собирати, и не обретоша. ²⁸ Рече же Господь моисеови: доколе не хощете послушати заповедий моих и закона моего? ²⁹ зрите: Господь бо даде вам субботу день сей: сего ради той даде вам в день шестый хлеба на два дни: седите кийждо вас в дому своем у себе, никтоже да исходит от места своего в день седмый. ³⁰ И субботствоваша людие в день седмый. ³¹ И прозваша сынове израилевы имя тому манна: бяше же яко семя кориандрово бело, вкус же его аки мука с медом. ³² Рече же им моисей: сей глаголгол, егоже завеща Господь: наполните гомор от манны в скров в роды вашя: да видят хлеб, егоже ядосте вы в пустыни, егда изведе вас Господь от земли египетския. ³³ И рече моисей ко аарону: возми стамну златую едину и вложи в ню гомор полный от манны, и положиши тую пред Богом в соблюдение в роды вашя. ³⁴ Якоже заповеда Господь моисею, положи ю аарон пред свидением в соблюдение. ³⁵ Сынове же израилевы ядоша манну лет четыредесять, дондеже приидоша в землю обитаемую, и ядоша манну, дондеже приидоша во страну финикийскую: ³⁶ гомор же десятая часть трех мер бяше.