¹ Поим Господви, славно бо прославися: коня и всадника вверже в море: ² помощник и покровитель бысть мне во спасение: сей мой Бог и прославлю его, Бог отца моего и вознесу его: ³ Господь сокрушаяй брани, Господь имя ему, ⁴ колесницы фараоновы и силу его вверже в море, избранныя всадники тристаты потопи в чермнем мори, ⁵ пучиною покры их, погрязоша во глубине яко камень: ⁶ десница твоя, Господи, прославися в крепости, десная твоя рука, Господи, сокруши враги: ⁷ и множеством славы твоея стерл еси сопротивных, послал еси гнев твой, пояде я яко стеблие, ⁸ и духом ярости твоея разступися вода: огустеша яко стена воды, огустеша и волны посреде моря: ⁹ рече враг: гнав постигну, разделю корысть, исполню душу мою, убию мечем моим, господствовати будет рука моя: ¹⁰ послал еси духа твоего, покры я море, погрязоша яко олово в воде зелней: ¹¹ кто подобен тебе в бозех, Господи, кто подобен тебе? прославлен во святых, дивен в славе, творяй чудеса: ¹² простерл еси десницу свою, пожре я земля, ¹³ наставил еси правдою твоею люди твоя сия, яже избавил еси, утешил еси крепостию твоею во обитель святую твою: ¹⁴ слышаша языцы и прогневашася, болезни прияша живущии в филистиме: ¹⁵ тогда потщашася владыцы едомстии и князи моавитстии, прият я трепет: растаяша вси живущии в ханаане: ¹⁶ да нападет на ня страх и трепет: величием мышцы твоея да окаменятся, дондеже пройдут людие твои, Господи, дондеже пройдут людие твои сии, яже стяжал еси: ¹⁷ введ насади я в гору достояния твоего, в готовое жилище твое, еже соделал еси, Господи, святыню, Господи, юже уготовасте руце твои: ¹⁸ Господь царствуяй веки, и на век, и еще: ¹⁹ егда вниде конница фараонова с колесницами и всадники в море, и наведе на них Господь воду морскую: сынове же израилевы проидоша сушею посреде моря. ²⁰ Взя же мариам пророчица, сестра ааронова, тимпан в руце свои, и изыдоша вся жены вслед ея со тимпаны и лики: ²¹ преднача же им мариам, глаголющи: поим Господви, славно бо прославися: коня и всадника вверже в море. ²² Поят же моисей сыны израилевы от моря чермнаго и веде их в пустыню сур: и идяху три дни в пустыни, и не обретаху воды пити. ²³ Приидоша же в мерру, и не можаху пити воды от мерры, горька бо бе: сего ради наречеся имя месту тому горесть. ²⁴ И роптаху людие на моисеа, глаголюще: что пием? ²⁵ Возопи же моисей ко Господу, и показа ему Господь древо, и вложи е в воду, и усладися вода: тамо положи ему оправдания и судбы, и тамо его искуси, ²⁶ и рече: аще слухом услышиши глас Господа Бога твоего, и угодная пред ним сотвориши, и внушиши заповедем его, и сохраниши вся оправдания его: всяку болезнь, юже наведох египтяном, не наведу на тя: аз бо есмь Господь Бог твой исцеляяй тя. ²⁷ И приидоша во елим, и бяху тамо дванадесять источников вод, и седмьдесят стеблий финиковых: и ополчишася тамо при водах.