¹ И рече Господь к моисею: вниди к фараону и речеши к нему: сия глаголет Господь: отпусти люди моя, да ми послужат: ² аще же не хощеши ты отпустити, се, аз побиваю вся пределы твоя жабами: ³ и изрыгнет река жабы, и излезшя внидут в домы твоя и в клети ложниц твоих, и на постели твоя и в домы рабов твоих и людий твоих, и в теста твоя и в пещы твоя, ⁴ и на тя и на рабы твоя и на люди твоя возлезут жабы. ⁵ Рече же Господь к моисею: рцы аарону брату твоему: простри рукою твоею жезл твой на реки и на кладязи и на езера, и изведи жабы на землю египетскую. ⁶ И простре аарон руку на воды египетския и изведе жабы: и излезоша жабы и покрыша землю египетскую. ⁷ Сотвориша же и волсви египетстии волхвованиями своими такожде и изведоша жабы на землю египетскую. ⁸ Призва же фараон моисеа и аарона и рече: помолитеся о мне ко Господу, да отженет от мене жабы и от людий моих: и отпущу люди, и пожрут Господви. ⁹ Рече же моисей к фараону: определи мне, когда помолюся о тебе и о рабех твоих и о людех твоих, да погибнут жабы от тебе и от людий твоих и от домов ваших, точию в реце да останутся. ¹⁰ Он же рече: заутра. Рече убо: якоже рекл еси, да увеси, яко несть иного разве Господа: ¹¹ и отженутся жабы от тебе и от домов ваших и от сел, и от рабов твоих и от людий твоих, точию в реце останутся. ¹² Изыде же моисей и аарон от фараона, и возопи моисей ко Господу о определении жаб, якоже совеща с фараоном. ¹³ Сотвори же Господь, якоже рече моисей: и изомроша жабы от домов и от сел и от нив их: ¹⁴ и собраша я в стоги стоги, и возсмердеся земля. ¹⁵ Видев же фараон, яко бысть отрада, отяготися сердце его, и не послуша их, якоже рече Господь. ¹⁶ И рече Господь к моисею: рцы аарону: простри рукою жезл твой и удари в персть земную, и будут скнипы в человецех и в скотех, и на фараоне и на доме его и рабех его, и весь песок земный станет скнипами во всей земли египетстей. ¹⁷ Простре убо аарон рукою жезл и удари в персть земную: и быша скнипы в человецех и в скотех, и во всякой персти земной быша скнипы во всей земли египетстей. ¹⁸ Твориша же и волсви волхвованми своими такожде извести скнипы, и не возмогоша: и быша скнипы в человецех и скотех. ¹⁹ Реша убо волсви фараону: перст Божий есть сие. И ожесточися сердце фараоново, и не послуша их, якоже рече Господь. ²⁰ Рече же Господь к моисею: востани заутра и стани пред фараоном, и се, он изыдет на воду, и речеши ему: сия глаголет Господь: отпусти люди моя, да ми послужат в пустыни: ²¹ аще же не хощеши отпустити людий моих, се, аз посылаю на тя и на рабы твоя, и на люди твоя и на домы вашя песия мухи: и наполнятся домове египетстии песиих мух и в земли, на нейже суть: ²² и прославлю в той день землю гесемску, на нейже людие мои сташа, на нейже не будет тамо песиих мух, да увеси, яко аз есмь Господь, Бог всея земли: ²³ и положу разлучение между людьми моими и людьми твоими: во утрии же будет знамение сие на земли. ²⁴ Сотвори же Господь тако: и прииде песиих мух множество в домы фараоновы и в домы рабов его и во всю землю египетску, и погибе земля от песиих мух. ²⁵ Воззва же фараон моисеа и аарона, глаголя: шедше пожрите жертву Господу Богу вашему в земли сей. ²⁶ И рече моисей: не может се тако быти, хулно бо се египтяном: не положим требу Господу Богу нашему: аще бо положим требу по хулению египетску пред ними, камением побиют ны: ²⁷ путем триех дний пойдем в пустыню и пожрем Господу Богу нашему, якоже рече Господь нам. ²⁸ И рече фараон: аз отпущаю вы, и пожрите Господу Богу вашему в пустыни: но не далече простирайтеся ити: помолитеся убо и о мне ко Господу. ²⁹ Рече же моисей: се, аз изыду от тебе и помолюся ко Господу Богу, и отидут песия мухи от тебе и от рабов твоих и от людий твоих заутра: да не приложиши еще, фараоне, прельстити, еже не отпустити людий пожрети Господу. ³⁰ Изыде же моисей от фараона и помолися Богу. ³¹ Сотвори же Господь, якоже рече моисей, и отя песия мухи от фараона и от рабов его и от людий его, и не остася ни едина. ³² И отяготи фараон сердце свое и во время сие, и не восхоте отпустити людий.