¹ Чада, послушайте своих родителей о Господе: сие бо есть праведно. ² Чти отца твоего и матерь: яже есть заповедь первая во обетовании: ³ да благо ти будет, и будеши долголетен на земли. ⁴ И отцы, не раздражайте чад своих, но воспитовайте их в наказании и учении Господни. ⁵ Раби, послушайте господий своих по плоти со страхом и трепетом, в простоте сердца вашего, якоже и Христа, ⁶ не пред очима точию работающе яко человекоугодницы, но якоже раби Христовы, творяще волю Божию от души, ⁷ со благоразумием служаще якоже Господу, а не яко человеком, ⁸ ведяще, яко кийждо, еже аще сотворит благое, сие приимет от Господа, аще раб, аще свободь. ⁹ И господие, таяжде творите к ним, послабляюще им прещения, ведуще, яко и вам самем и тем Господь есть на небесех, и обиновения лица несть у него. ¹⁰ Прочее же, братие моя, возмогайте во Господе и в державе крепости его: ¹¹ облецытеся во вся оружия Божия, яко возмощи вам стати противу кознем диаволским, ¹² яко несть наша брань к крови и плоти, но к началом и ко властем (и) к миродержителем тмы века сего, к духовом злобы поднебесным. ¹³ Сего ради приимите вся оружия Божия, да возможете противитися в день лют и вся содеявше стати. ¹⁴ Станите убо препоясани чресла ваша истиною, и оболкшеся в броня правды, ¹⁵ и обувше нозе во уготование благовествования мира: ¹⁶ над всеми же восприимше щит веры, в немже возможете вся стрелы лукаваго разжженныя угасити: ¹⁷ и шлем спасения восприимите, и мечь духовныи, иже есть глаголгол Божий: ¹⁸ всякою молитвою и молением молящеся на всяко время духом, и в сие истое бдяще во всяком терпении и молитве о всех святых ¹⁹ и о мне, да дастся ми слово во отверзение уст моих, с дерзновением сказати тайну благовествования, ²⁰ о немже посолствую во узах, да в нем дерзаю, якоже подобает ми глаголати. ²¹ Да увесте же и вы, яже о мне, что делаю, вся скажет вам тихик, возлюбленныи брат и верен служитель о Господе, ²² егоже послах к вам на сие истое, да увесте, яже о нас, и да утешит сердца ваша. ²³ Мир братии и любовь с верою от Бога Отца и Господа Иисуса Христа. ²⁴ Благодать со всеми любящими Господа нашего Иисуса Христа в неистлении. Аминь.