¹ Глаголю убо: еда отрину Бог люди своя? Да не будет. Ибо и аз израильтянин есмь, от семене авраамля, колена вениаминова. ² Не отрину Бог людей своих, ихже прежде разуме. Или не весте, о илии что глаголет писание, яко приповедует Богови на израиля, глаголя: ³ Господи, пророки твоя избиша и олтари твоя раскопаша: и аз остах един, и ищут души моея, изяти ю. ⁴ Но что глаголет ему Божественный ответ? Оставих себе седмь тысящ мужей, иже не преклониша колена пред ваалом. ⁵ Тако убо и в нынешнее время останок по избранию благодати бысть. ⁶ Аще ли по благодати, то не от дел: зане благодать уже не бывает благодать. Аще ли от дел, ктому несть благодать: зане дело уже несть дело. ⁷ Что убо? Егоже искаше израиль, сего не получи, а избрание получи. прочии же ослепишася, ⁸ якоже есть писано: даде им Бог дух умиления, очи не видети и ушы не слышати, даже до днешняго дне. ⁹ И давид глаголет: да будет трапеза их в сеть и в лов, и в соблазн и в воздаяние им: ¹⁰ да помрачатся очи их еже не видети, и хребет их выну сляцай. ¹¹ Глаголю убо: еда согрешиша, да отпадут? Да не будет. Но тех падением спасение языком, во еже раздражити их. ¹² Аще ли же прегрешение их богатство мира, и отпадение их богатство языков: кольми паче исполнение их? ¹³ Вам бо глаголю языком: понеже убо есмь аз языком апостол, службу мою прославляю. ¹⁴ Аще како раздражу мою плоть, и спасу некия от них? ¹⁵ Аще бо отложение их, примирение миру, что приятие, разве жизнь из мертвых? ¹⁶ Аще ли начаток свят, то и примешение: и аще корень свят, то и ветви. ¹⁷ Аще ли некия от ветвей отломишася, ты же, дивия маслина сый, прицепился еси в них, и причастник корене и масти маслинныя сотворился еси, ¹⁸ не хвалися на ветви: аще ли же хвалишися, не ты корень носиши, но корень тебе. ¹⁹ Речеши убо. отломишася ветви, да аз прицеплюся. ²⁰ Добре: неверием отломишася, ты же верою стоиши: не высокомудрствуй, но бойся. ²¹ Аще бо Бог естественных ветвей не пощаде, да не како и тебе не пощадит. ²² Виждь убо благость и непощадение Божие: на отпадших убо непощадение, а на тебе благость Божия, аще пребудеши в благости: аще ли же ни, то и ты отсечен будеши. ²³ И они же, аще не пребудут в неверствии, прицепятся: силен бо есть Бог паки прицепити их. ²⁴ Аще бо ты от естественныя отсечен дивия маслины, и чрез естество прицепился еси к добрей маслине: кольми паче сии, иже по естеству, прицепятся своей маслине? ²⁵ Не бо хощу вас не ведети тайны сея, братие, да не будете о себе мудри, яко ослепление от части израилеви бысть, дондеже исполнение языков внидет, ²⁶ и тако весь израиль спасется, якоже есть писано: приидет от сиона избавляяй, и отвратит нечестие от иакова: ²⁷ и сей им от мене завет, егда отиму грехи их. ²⁸ По благовествованию убо, врази вас ради: по избранию же, возлюблени отец ради. ²⁹ Нераскаянна бо дарования и звание Божие. ³⁰ Якоже бо и вы иногда противистеся Богови, ныне же помиловани бысте сих противлением: ³¹ такожде и сии ныне противишася вашей милости, да и тии помиловани будут. ³² Затвори бо Бог всех в противление, да всех помилует. ³³ о, глубина богатства и премудрости и разума Божия! яко неиспытани судове его, и неизследовани путие его. ³⁴ Кто бо разуме ум Господень, или кто советник ему бысть? ³⁵ Или кто прежде даде ему, и воздастся ему, ³⁶ Яко из того и тем и в нем всяческая. Тому слава во веки. Аминь.